بلخ کې سیمه ییزه سرچینې وايي، ځايي طالب چارواکو، دغه ولایت کې سخي زیارت « روضې مبارکې» ته، چې د شیعیه ګانو لومړي امام حضرت علي ته منسوب دی، د ښځو په ننوتو تازه محدودیت لګولی دی.
رخشانه: مزارشریف ښار کې لږ تر لږه پنځو سرچینو رخشانې رسنۍ ته ویلي، طالبان هغه مېرمنو ته چې رسمي مکتوب ونه لري، روضې مبارکې ته د ننوتو اجازه نه ورکوي.
د سرچینو په وینا، له دې وړاندې هم مزار شریف ښار کې ښځې روضې مبارکې ته له ننوتلو منع شوې وې، خو مسافرو ښځو چې له نورو ولایتونو به دې زیارت ته راتلې، له محرم سره یو ځای دې تاریخي ځای ته د ننوتو اجازه درلوده.
سرچینو زیاته کړې، له یوې میاشتې راپدېخوا، دا کړنلاره هم درېدلې او اوس ان مسافرو ښځو ته هم د بلخ ولایت د مقام له رسمي مکتوب پرته، روضې ته د ننوتو اجازه نه لري.
د سرچینو د معلوماتو له مخې، دا فرمان بلخ کې د طالب والي له خوا «د روضې د ننه د ځینو چلندونو [په لیدو] سره» صادر شوی دی.
شمسیه (مستعار نوم) چې له خپلو دریو لوڼو سره یو ځای له کابله مزارشریف ښار ته راغلې ویلي، دوی په وار وار هڅه کړې تر څو روضې ته د ننه شي، خو طالب ځواکونو یې مخیوی وکړ.
هغه وايي، طالب ځواکونو دوی ته ولي، یوازې په هغه صورت کې، چې د بلخ د والي مکتوب له ځان سره ولري، دې ځای ته د ننوتو اجازه ښايي ورکړل شي.
دې مېرمنې ویلي دي: «کله چې مې له طالب ځواکونو وپوښتل ولې اجازه نشته، په ستوغه یې راته و ویل، ښځو د روضې د ننه کفري کارونه کول، د روضې، دروازه، دېوالونه او پنجرې یې ښکلولې، نجونو انخورونه او ویډیوګانې اخیستې او په فسبوک او ټیک ټاک کې یې خپرولې.»
مزارشریف ښار کې مبارکه روضه په بلخ او هېواد کې، یو له خورا مهمو مذهبي او تاریخي ځایونو څخه ګڼل کېږي.
د طالبانو تر بیا واکمنېدو مخکې، هر کال د نوروز مراسم «جنډه پورته کول» د هېواد د زرګونو وګړو په حضور کې، په دې ځای کې ترسره کېدل.
طالبانو تېر کابو پنځه کاله، هېواد کې د ښځو او نجونو په وړاندې د سختو محدودیتونو لګولو سربېره، هغوی پارکونو او د وخت تېري ځایونو، هوټلونو او بازارونو ته ورتګ بند کړی دی.
