افغانستان کې د ملګرو ملتونو د ماشومانو ملاتړي صندوق (یونیسف) ویلي، ۲۰۲۵ میلادي کال یې په افغانستان کې، په سخته خوراځواکۍ اخته ۶۱۰ زره ماشومان درملنه کړي دي.
رخشانه: دې بنسټ نن (سه شنبې د وري ۱۱ مه) په اېکس پاڼه د یوه پوسټ په خپرولو سره لیکلي، روان میلادي کال هوډ لري، چې ۱.۶ میلیونه نور په خوارځواکۍ اخته ماشومانو ته د درملنې زمینه برابره کړي.
یونیسف په خپله اعلامیه کې د یوې مور له قوله، چې ماشوم یې په خوارځواکۍ اخته و او د دې بنسټ په ملاتړ درملنه شوی، لیکلي «هغه مخکې خورا کمزوری وو. اوس ډېره ډوډۍ خوري او زیاته انرژي لري.»
نړیوالو سازمانو تل د طالبانو تر واک لاندې افغانستان کې د سختې لوږې او په خوارځواکۍ د اخته کسانو د زیاتوالي په اړه خبرداری ورکړی دی.
د دې بنسټ په وینا، طالبانو د مرستندویه بنسټونو پر کار د محدودیتونو لګول او د مرستو د وېش برخه کې مداخله، په هېواد کې د بشري بحران د زیاتېدو سبب شوي دي.
څه موده وړاندې د خوړو نړیوال پروګرام (WFP) په افغانستان کې د لوږې د زیاتېدو په اړه خبرداری ورکړی او ویلي یې دي، افغانستان لا هم په نړۍ کې د لوږې یو له سختو بحرانونو تجربه کوي او کابو ۱۷.۴ میلیونه وګړي د خوړو بېړنیو مرستو ته اړتیا لري.
دا بنسټ وايي، افغانستان کې د ماشومانو د خوړو کچه هم اندېښمنوونکي برید ته رسېدلې او اټکل کېږي، چې ۲۰۲۶ کال کې به ۳.۷ میلیونه ماشومان درملنې ته اړتیا ولري.
د خوړو نړیوال پروګرام زیاته کړې وه، چې دا مهال د بودجې د کمښت له امله، له هرو څلورو ماشومانو چې له سختې خوارځواکۍ ژغورونکې درملنې ته اړتیا لري، درې تنه یې ردوي.
