کاپیسا کې سیمه ییز طالب چارواکي وايي، د دې ولایت مرکز محمود راقي ښار کې یوه ښځې څاه ته د لوېدو له امله ژوند له لاسه ورکړی او وړه لور یې ټپي شوې ده.
رخشانه: کاپیسا کې د طالبانو له پېښو سره د مبارزې رییس محمد صابر احمد سیمه ییزه رسنیو ته ویلي، دا پېښه پرون (دوشنبې د وري ۱۰ مه) د محمود راقي ښار د «محمد عمرخېل» په سیمه کې رامنځ ته شوې ده.
د هغه په وینا، دا ښځه له خپلې لس کلنې لور سره یو ځای یو سرخلاصي څاه ته لوېدلې، چې په ترڅ کې یې مور ژوند له لاسه ورکړی او لور یې ټپي شوې ده.
د پېښو سره د مبارزې طالب رییس ویلي، وړه نجلۍ د سیمې د خلکو له خوا ژغورل شوې ده.
د دې ښځې د هویت او عمر په اړه څه نه دي ویلي او د ټپي ماشومې د روغتیايي حالت په اړه هم معلومات نشته.
له دې وړاندې هم د هېواد په یو شمېر ولایتونو کې ځینې هېوادوال په ځانګړې توګه ښځې او ماشومان، سرخلاصو څاه ګانو ته لوېدلي او ژوند یې له لاسه ورکړی دی.
