افغانستان کې د ملګرو ملتونو سیاسي استاوزلۍ دفتر (یوناما) وايي، دې هېواد کې د ماینونو او ناچاودو توکو د چاودنو ۸۰ سلنه قربانیان ماشومان دي.
رخشانه: دې بنسټ نن (چهارشنبې د وري ۱۲ مه) په خپله فسبوک پاڼه د یوه پوسټ په خپرولو سره لیکلي، افغانستان د چاودېدونکو توکو د مرګ ژوبلې له مخې په نړۍ کې دریمه درجه هېواد دی.
د یوناما په وینا، افغانستان کې د جګړو مهال له پاتې شونو ماینونو او ناچاودو توکو د چاودنو له امله، هره میاشت کابو ۵۰ تنه مړه او ټپیان کېږي، چې شاوخوا ۸۰ سلنه یې ماشومان دي.
د ملګرو ملتونو سیاسي استازولۍ لیکلي، کابو هره ورځ لږ تر لږه یوه پېښه رامنځ ته کېږي او ډېر احتمال شته، چې د هغو قرباني یو ماشوم وي.
د دې بنسټ په وینا، د دې پېښو نېږدې ۹۰ سلنه یې د څلورو لسیزو جګړو څخه د پاتې شویو ناچاودو او نورو توکو له امله دي.
یوناما لیکلي، افغانستان کې په ناچاودو تکو لړلې، له ۱۰۰۰ کیلومتره مربع زیاته ځمکه معلومه شوې ده. د دې لړلې ځمکې په یو کیلومترۍ کې شاوخوا ۹۰۰ ښوونیز او ۲۰۰ روغتیايي مرکزونه شتون لري.
دې بنسټ ویلي، د ماین پاکۍ د هڅو په وړاندې تر ټولو ستر خنډ د بودجه کمښت ګڼل کېږي.
ملګرو ملتونو د جګړو له پاتې شونو ناچاودو توکو څخه د پاکولو لپاره د بېړنۍ مالي مرستې غوښتنه کړې ده.
