طالبانو د روانې اوونۍ په اوږدو کې، په هرات، بلخ، جوزجان، دایکنډي، فاریاب، سمنګان، فراه، پکتیکا، نیمروز، ننګرهار او غور ولایتونو کې د اتو ښځو په ګډون ۵۹ تنه د بېلا بېلو تورونو له آمله د خلکو په وړاندې په دورو وهلي دي.
رخشانه: دا کسان، د الکولي مشروباتو د تولید، پېر، پلور او لېږد، نامشروع اړیکې، له واده بهر جنسي اړیکې، لواطت، د پلار وهلو ټکولو، طالبانو ته د سپکاوي، روژې خوړولو او غلا په تورونو په دې یوولسو ولایتونو کې په دورو وهل شوي دي.
یکشنبې د (وري ۹ مه) هرات، بلخ او جوزجان ولایتونو کې د درې ښځو په ګډون ۱۴ تنه، د بېلا بېلو تورونو له امله د خلکو په وړاندې په دورو وهل شوي دي.
اوه تنه هرات ښار کې د الکولي مشروباتو د تولید، پېر، پلور او لېږد په تور د خلکو په وړاندې ۳۹ دورې وهل شوي او په دوه کاله تنفذي بند هم محکوم شوي دي.
یوه ښه د نامشروع اړیکې په تور د بلخ په زارې ولسوالۍ کې د خلکو په وړاندې ۳۵ دورې وهل شوې او په پنځه کاله تنفذي بند هم محکومه شوې ده.
د دوه ښځو په ګډون شپږ تنه د نامشروع اړیکې، طالبانو ته په سپکاوي، روژې خوړلو او له واده بهر جنسي اړیکې په تورونو، د جوزجان قوش تېپې ولسوالۍ کې د خلکو په وړاندې له ۲۰ تر ۳۹ دورو وهل شوي او له شپږو میاشتو تر دوه کلونو په تنفذي بند محکوم شوي دي.
دوشنبې د (وري ۱۰ مه) د یوې ښځې په ګډون اووه تنه، په دایکنډي او فاریاب ولایتونو کې د خلکو په وړاندې په دورو وهل شوي دي.
څلور تنه د روژې خوړولو او شرابو د لېږد په تور د دایکنډي ولایت په مرکز نیلي ښار کې د خلکو په وړاندې له ۲۰ تر ۳۹ دورو وهل شوي او له دوه میاشتو تر یوه کال تنفذي بند محکوم شوي دي.
د یوې ښځې په ګډون درې تنه، د نامشروع اړیکې په تور، د فاریاب ولایت شرین تګاب ولسوالۍ کې د خلکو په وړاندې ۳۱ دورې وهل شوي او په یوه کال تنفذي بند محکوم شوي دي.
سه شنبې د (وري ۱۱ مه) د دو ښځو په ګډون شپږ تنه، د بېلا بېلو تورونو له امله، په بلخ او سمنګان ولایتونو کې د خلکو په وړاندې په دورو وهل شوي.
دوه تنه د لواطت په تور د بلخ شورتپه ولسوالۍ کې د خلکو په وړاندې له ۳۰ تر ۳۹ دورو وهل شوي او په دوه کاله تنفذي بند محکوم شوي دي.
د دو ښځو په ګډون څلور تنه، له کوره د تېښتې او له واده بهر جنسي اړیکې په تور، د سمنګان ولایت حضرت سلطان ولسوالۍ کې د خلکو په وړاندې ۳۹ دورې وهل شوي. معلومه نه ده، چې دې کسانو ته څومره بند سزا اورول شوې.
چهارشنبې د (وري ۱۲ مه) د یوې ښځې په ګډون ۳۰ تنه د بېلا بېلو تورونو له امله، په فراه، پکتیکا، ننګرهار او نیمروز ولایتونو کې د خلکو په وړاندې په دورو وهل شوي دي.
د یوې ښځې په ګډون پنځه تنه د نامشروع اړیکې او غلا په تور د فراه ولایت بالابلوک ولسوالۍ کې د خلکو په وړاندې له ۲۰ تر ۳۹ دورو وهل شوي. معلومه نه ده، چې دا کسان په څومره بند سزا محکوم شوي.
دوه تنه د نامشروع اړیکې د پکیتکا ولایت جاني خېل ولسوالۍ کې د خلکو په وړاندې ۳۵ دورې وهل شوي او په دوه کاله تنفذي بند هم محکوم شوي دي.
شپږ تنه د روژې خوړلو په تور، د ننګرهار ولایت شېرزاد ولسوالۍ کې د خلکو په وړاندې ۲۰ دورې وهل شوي او په دوه میاشتې تنذي بند هم محکوم شوي دي.
۱۷ تنه د پلار د وهلو ټکولو، نامشروع اړیکې، غلا او لواطت په تور، د نیمروز ولایت مرکز زرنج ښار کې د خلکو په وړاندې، له ۱۵ تر ۳۹ دورو وهل شوي او له پنځو میاشتو تر اتو کلونو په تنفذي بند محکوم شوي دي.
پنشنبې د (وري ۱۳ مه) د یوې ښځې په ګډون دوه تنه د لواطت او اخلاقي فساد په تور، بلخ او غور ولایتونو کې د خلکو په وړاندې په دورو وهل شوي دي.
یو تن د بلخ ولایت شورتپه ولسوالۍ کې د خلکو په وړاندې ۳۰ دورې وهل شوی او په دوه کاله تنفذي بند هم محکوم شوی دی.
یوه ښځه د اخلاقي فساد په تور، د غور ولایت ساغر ولسوالۍ کې د خلکو په وړاندې ۱۰ دورې وهل شوې ده. معلومه نه ده، چې دې ښځې ته څومره موده بند سزا اورول شوې ده.
که څه هم ملګرو ملتونو او د بشري حقونو بنسټونو په وار وار، د طالبانو له لوري بدني سزاوې د انساني کرامت خلاف بللې او غندلې، خو طالبانو په تېرو کابو پنځو کلونو کې، په هېواد کې د ښځو په ګډون زرګونه تنه او په ځینو موادو کې ان ماشومان، په بېلا بېلو تورونو د خلکو په وړاندې په دورو وهلي دي.
دغه راز دې ډلې په دې موده کې له بشري حقونو په سرغړونو او د افغانستان نړیوالو ژمنو په ماتولو سره، لږ تر لږه ۱۲ تنه په بېلا بېلو تورونو د هېواد په شپږو ولایتونو کې د زرګونه نندارچیانو په وړاندې اعدام کړي دي.
