لغمان کې سیمه ییز طالب چارواکي وايي، د دې ولایت الینګار ولسوالۍ ک د غره ښوویدو له امله یوې ماشومې نجلۍ ژوند بایللی دی.
رخشانه: د لغمان کې د طالبانو د والي ویاند عبدالمالک نیازی وايي، دا پېښه نن (پنشنبې د وري ۳ مه) له ماسپښين وروسته، د الینګار ولسوالۍ د «سنګر درې» په «میرګل» کلي کې رامنځ ته شوې ده.
د هغه په وینا، دا ماشومه نجلۍ ۱۱ کلنه وه او حکمت بي بي نومېده.
لغمان کې د طالبانو د والي ویاند ویلي، دا پېښه د غره د ناڅاپه ښوویدنې له امله رامنځ ته شوې ده.
ورته پېښې هر کال د هېواد په یو شمېر ولایتونو کې رامنځ ته کېږي، چې انساني مرګ ژوبله له ځان سره لري.
له څو ورځو راپدېخوا په ټول هېواد کې ورښتونه دوام لري او په ډېری ولایتونو کې د باران ورېدل د سېلابونو راوتلو لامل شوي دي.
طالبانو اعلان کړی، چې هېواد کې د بارانونو او سېلابونو راوتلو له امله، د ښځو او ماشومانو په ګډون لسګونه تنو ژوند بایللی او ټپیان شوي، سلګونه جرېبه ځمکه او لسګونه د استوګنې کورونه ویجاړ شوي دي.
