د طالبانو تر واک لاندې سرې میاشتې ټولنې (ARC) ویلي، د زلزلې له امله د ښځو او ماشومانو په ګډون ۱۲ تنو ژوند له لاسه ورکړی او دوه تنه نور ټپیان شوي دي.
رخشانه: دې ادارې نن شنبې (د وري ۱۵ مه) په خپله اېکس پاڼه د یوه پوسټ په خپرولو سره لیکلي، دا کسان د جمعې شپې (وري ۱۴ مې» په زلزله کې په کابل کې وژل شوي او ټپیان دي.
افغاني سرې میاشتې ټولنې لیکلي، د دې زلزلې کچه د ریشتر په حساب ۵.۸ درجې او مرکز یې بدخشان ولایت وو.
د دې ادارې په وینا، روغتیايي ټیمونه د دې پېښې د قربانیانو سره د مرستې په موخه سیمې ته لېږل شوي او د ژوغورنې عملیات دوام لري.
د طالبانو تر ولکې لاندې ملي راډیو تلوېزیون نن سهار راپور ورکړی، چې کابل کې د شوې زلزلې له امله د ښځو او ماشومانو په ګډون د یوې کورنۍ ۸ غړو ژوند بایللی او یو بل ماشوم ټپي شوی دی.
ملي راډیو تلوېزیون لیکلي، د دې زلزلې له امله د کابل بګرامي ولسوالیو کې د یوې کورنۍ اتو غړو، چې پلار، مور، څلور لوڼې او دوه زامن شامل وو، ژوند بایللی او یو بل ماشوم ټپي شوی دی.
د دې پېښې قربانیان، د بګرامي ولسوالۍ د «ګوسفند دره» اوسېدونکي او د یوې کورنۍ غړي دي.
ملي راډیو تلوېزیون زیاته کړې، د دې کورنۍ یوازې یو غړی، چې هغه هم ماشومه نجلۍ ته، له پېښې ژوندۍ وتلې ده.
د دې ماشومې نجلۍ د روغتیايي وضعیت په اړه معلومات په لاس کې نشته.
تېره شپه نېږدې ۹ بجې د د کابل ښار اوسېدونکو د یوې نسبتآ سختې زلزلې د پېښېدو خبر ورکړ.
خو د دولسو ساعتونو په تېرېدو سره لا هم د دې طبیعي پېښې د احتمالي مرګ ژوبلې او مالي زیان په اړه کره معلومات په لاس کې نشته.
