په «جلاوطنۍ کې د آزادګان غورځنګ» غړو په یوه اعتراضي غونډه کې یو ځل بیا له نړیوالې تولنې او نړیوالو بنسټونو وغوښتل، چې افغان ښځو ته پاملرنه وکړي.
رخشانه: د دې اعتراضي غورځنګ غړو ویلي دوی دا غونډه د «نوریه، هغه نجلۍ چې د بېوزلۍ او ډوډوۍ موندلو په موخه د هلکانو جامو اغوستلو ته اړ شوې وه د وضعیت بیا جوړلو» په پار جوړه کړې ده.
په جلا وطنۍ کې د آزادګان غورځنګ په اعلامیه کې راغلي چې د «نوریې د کیسې بیا راژوندي کولو سره یې هڅه کړې، د هغې او زرګونه نورو محرومو افغان نجونو غږ شي.»
معترضو مېرمنو زیاته کړې، د طالبانو تر واک لاندې افغانستان کې ښځې ځپل شوې او د خپل اوچتولو توان نه لري.
هغوی له نړیوالې ټولنې او بشري حقونو له بنسټونو غوښتي، چې له افغان ښځو ملاتړ وکړي، تر څو هېڅ یوه ښځه د خپل جنسیت له امله، د تبعیض او محرومیت زغملو ته اړ نه شي.
طالبانو په تېرو کابو پنځو کلونو کې د سختو محدودیتونو لګولو سره افغان ښځې او نجونې له خپلو ټولو حقونو او او لومړنیو خپلواکیو محرومې کړې دي. معترضو مېرمنو د ښځو د حقونو فعالانو په دې موده کې، د اعتراضي غونډو په جوړلو سره، د افغان ښځو وضعیت ته د نړیوالې ټولنې د پاملرنې غوښتنه کړې ده.
طالبانو تر اوسه په ښځو او نجونو له لګول شویو محدودیتونو یو هم نه دی لرې کړی، بلکې دا محدودیتونه یې لا سخت کړي دي.
