د «طلايي ستنې ادبي ټولنې» یو شمېر زده کوونکو نجونو، هېواد کې د نجونو پر مخ د ښوونځیو او پوهنتونونو تړل کېدو په غبرګون کې، خپل انلاین ټولګي د ښوونځیو د تړلو دروازو تر شا جوړ کړل.
رخشانه: دې زده کوونکو نجونو په یوه اعلامیه کې لیکلي، دا سمبولیک ګام یې د «له پنځو کلونو راهیسې په زور د نجونو پر مخ د ښوونځیو او پوهنتونو د تړل کېدو» په غبرګون کې په بېلا بېلو ښارونو او د تړلو ښوونځیو د دروازو تر شا د اعتراض لپاره ترسره کړي دي.
په اعلامیه کې راغلي «دا ګام د عدالت او برابرۍ لپاره یو غږ دی، په افغان ټولنه او نړۍ کې د هغه مقاومت یادونه کوي، چې په کلونو کې د دې خاورې نجونې د خپل تر ټولو اساسي بشري حق، چې د زده کړې حق دی محرومې شوې دي.»
دغو زده کوونکو نجونو ټينګار کړی چې «دا خوځښت نه یوازې یو اعتراض، بلکې د ټولیز وجدان د راویښولو یوه هڅه ده.»
هغوی «زده کړې د ټولنې د هر وګړي په ځانګړې توګه د نجونو مسلم حق» بللی او ټینګار یې کړی، چې هېڅ ځواک نه شي کولی د زده کړې حق له پامه وغورځوي.
زده کوونکو نجونو د «نجونو د زده کړې حق» لپاره د خلکو په ملاتړ ټینګار کړی ویلي یې دي، د خلکو ملاتړ کولی شي دا اعتراض په یوه ډلیزه غوښتنه بدل کړي.
دوی زیاته کړې، افغان ښځې هم د نارینه وو په شان د ژوند په ټولو برخو کې د فعال شتون او برابرۍ حق لري.
د طلايي ستنې ادبي ټولنه، د لیکوالې او ښځو د حقونو فعالې حمیرا قادري تر نظر لاندې د ۲۰۲۱ کال د سپټمبر په ۲۸ مه خپل فعالیت پیل کړی دی. د دې ټولنې ډېری غړي او زده کوونکي، له زده کړو پاتې نجونې دي.
دې زده کوونکو نجونو په داسې حال کې په دې سبمولیک اقدام لاس پورې کړی، چې طالبانو له تېرو پنځو کلونو راهیسې، د ښځو او نجونو په وړاندې سخت محدودیتونه لګولي او هغوی یې له خپلو تر ټولو بنسټیزو حقونو څخه بې برخې کړې دي.
د ډلې د نورو محدودیتونو سربېره، په هېواد کې ښوونځیو، نیمه لوړو زده کړو موسسو او پوهنتونونو دروازې د نجونو او ښځو پر مخ تړلې دي.
که څه هم د بشري حقونو بنسټونو، معترضو ښځو او د بشري حقونو فعالانو په وار وار په هېواد کې د ښځو او نجونو په وړاندې د طالبانو د محدودیتونو د لرې کولو غوښتنه کړې، خو طالبانو تر اوسه د دې یوه محدودیت لرې کولو ته هم غاړه نه ده ايښې.
