میدان وردګ او ننګرهار کې سیمه ییز طالب چارواکي وايي، دې دوه ولایتونو کې د څو کورونو د چت لوېدو له امله، د ښځو او ماشومانو په ګډون د نهو تنو ژوند اخیستی او اوه تنه نور ټپیان شوي دي.
رخشانه: میدان ورګ د طالبانو امنیه قوماندانۍ ویلي، د دې ولایت «جغتو» ولسوالۍ کې د یوه کور د چت لوېدو په پېښه کې، یوې ښځې او دوه ماشومانو ژوند بایللی او دوه تنه نور ټپیان شوي دي.
دا پېښه پرون (یکشنبې د وري ۱۶ مه) د جغتو ولسوالۍ د «کوزه علاني» په سیمه کې رامنځ ته شوې ده.
میدان وردګ کې د طالبانو امنیه قوماندانۍ په خبرپاڼه کې لیکلي، د دې کور چت د باران ورېدو له امله لوېدلی دی.
خبرپاڼه کې راوړل شوي، د دې کور د چت لوېدو پېښه کې یوې ښځې او دوه ماشومانو ژوند له لاسه ورکړی او دوه تنه نور ټپیان شوي دي.
د مړو شویو کسانو هویت او عمر او د ټپیانو روغتیايي حالت، عمر او جنسیت نه دی معلوم شوی.
بل خوا ننګرهار کې د طالبانو د والي د رسنیو دفتر هم په یوه خبرپاڼه کې لیکلي، د دې ولایت په پچیراګام، خوګیاڼو او سپین غر ولسوالیو کې د څو کورونو د چتونو لوېدو له امله شپږو تنو ژوند له لاسه ورکړی او اووه تنه نور ټپیان شوي دي.
خبرپاڼه کې راوړل شوي، نن (دوشنبې د وري ۱۷مه) سهار مهال ۲ بجې د پچیراګام ولسوالۍ په «موسی خېل» سیمه کې د یوه کور چت پرېوتی، چې له امله یې درې ماشومانو ژوند بایللی او درې نور ټپیان شوي دي.
د خبرپاڼې له مخې، تېره ورځ هم د خوګیاڼو ولسوالۍ په احمد خېل سیمه کې د یوه کور د چت لوېدو پېښه کې درې ماشومانو ژوند له لاسه ورکړی او یو بل ماشوم ټپی شوی وو.
د جمعې په شپه بیا د کابل ښار د دیارلسمې ناحیې اړوند مهدیه ښارګوټي کې د یوه کور د چت پرېوتو له امله یوې ښځې او یوه سړي ژوند بایللی وو.
له اوونۍ زیاته موده کېږي، چې د افغانستان په کابو ټولو ولایتونو کې سختو بارانونو ورېدو پیل کړی دی.
د راپورونو له مخې، د دې بارانونو او سېلابونو راوتلو له امله، د هېواد په ګوټ ګوټ کې لسګونو کسانو ژوند بایللی، د استوګنې لسګونه کورونه او سلګونه جرېبه کرنیزه ځمکه ویجاړه شوې ده.
