هرات کې سیمه ییزه سرچینې وايي، د طالبانو د امربالمعروف ځواکونو هرات زېږنتون کې د افغان کورنۍ لارښود ټولنې(AFGA) اړوند یوه څانګه تړلې ده.
رخشانه: د هرات زېږنتون څخه یوې سرچینې د هویت پټ ساتلو سره رخشانې رسنۍ ته ویلي، دا څانګه پرون (شنبې د وري ۱۵ مه) د طالبانو له لوري تړل شوې ده.
د سرچینې په وینا، د افغان کورنۍ لارښودې ټولنې ښځو ته د سونوګرافۍ او د امیدوارۍ د دوران بشپړو درملو وېش خدمات وړاندې کول.
د رخشانې رسنۍ سرچینه وايي، دا څانګه د بهرنیو موسساتو له خوا تمویل کېده او په ډېره کمه بیه یې ښځو ته خدمات وړاندې کول.
هغې ویلي: «ناروغانو یوازې د ۵۰ افغانیو په بدل کې سونوګرافي کېدل او د امیدوارۍ د دوران بشپړ درمل ورته وېشل کېدل.»
د افغان کورنۍ لارښود ټولنه یو غیر انتفاعي سازمان دی، چې په ټول هېواد کې د جنسي او زېږون روغتیا خدماتو وړاندې کولو فعالیت لري.
دې بنسټ تر اوسه هرات کې د خپلې دې څانګې د تړل کېدو په اړه غبرګون نه دی ښودی.
تر اوسه هرات کې د طالبانو د عامې روغتیا ریاست او د هرات زېږنتون چارواکو هم په دې اړه څه نه دي ویلي.
طالبانو د ۲۰۲۱ کال په اګست کې واک ته له رسېدو وروسته، د کورنیو او بهرنیو موسساتو له خوا د خدماتو په وړاندې کولو او د روغتیا په سکتور کې د کارکوونکو ښځو په کار باندې هم ډېر محدودیتونه لګولي دي.
د افغانستان د بشري حقونو لپاره د ملګرو ملتونو ځانګړي راپور ورکوونکي ریچارد بنټ څه موده وړاندې په یوه راپور کې ویلي وو، طالبانو د محدودیتونو په لګولو سره د افغانستان روغتیايي سکتور ته ژور زیان رسولی دی.
طالبانو پر ښځو او نجونو د نورو محدودیتونو سربېره، هغوی په پوهنتونونو په ځانګړې توګه د طب په څانګو کې له زده کړې هم منع کړې دي. د دې محدودیتونو لګولو د هېواد په روغتیايي برخې نېغې اغېزې کړې دي.
دې محدودیتونو روغتیايي خدماتو ته لاسرسی لا زیات محدود کړی او د عمومي روغتیا په ځانګړې توګه د میندو او ماشومانو لپاره به منفي پایلې ولري.
نړیوالو سازمانو تل د طالبانو تر واک لاندې افغانستان کې د روغتیايي کادر د کمښت په اړه خبرداری ورکړی ویلي یې دي، دې ډلې په پوهنتونونو کې د ښځو په زده کړه د محدودیتونو لګولو سره د هېواد روغتیايي سکتور فلج کړی دی.
