افغانستان کې د ملګرو ملتونو د وګړو صندوق (UNFPA) ویلي، افغانستان په آسیا کې یو له هغه هېوادونو دی، چې د میندو د مړینې کچه په کې زیاته ده.
رخشانه: دې بنسټ نن (سه شنبې د وري ۱۸ مه) د روغتیا نړیوالې ورځې سره سم، په خپله اېکس پاڼه لیکلي، روغتیايي او د زېږون خدماتو ته د میندو لاسرسی اړین دی.
د ملګرو ملتونو وګړو صندوق لیکلي «افغانستان په آسیا او ارام سمندر کې یو له هغه هېوادونو دی، چې د میندو د مړینې لوړه کچه لري.»
دې بنسټ زیاته کړې، افغانستان کې روغتیايي او زېږون خدماتو ته د میندو لاسرسی یو له ژغورونکو اړیتاوو څخه دی.
د ملګرو ملتونو د وګړو صندوق افغان میندو ته د روغتیايي خدماتو وړاندې کولو په ملاتړ ټينګار کړی ویلي یې دي، «ټول باید په ګډه د روغتیا لپاره» هڅه وکړو.
د افغانستان د بشري حقونو لپاره د ملګرو ملتونو ځانګړي راپور ورکوونکي څه موده وړاندې په یوه راپور کې لیکلي وو، د طالبانو محدودیتونه پروخت روغتیايي څارنو د میندو لاسرسی له خنډ سره مخ کړی او په زیانونو د اخته کېدو او مرینې کچه زیاتوي.
د ملګرو ملتونو د بشري مرستو د همغږۍ دفتر (اوچا) هم په یوه راپور کې لیکلي، چې افغانسان کې د میندو مړینه د نړۍ له منځنۍ کچې درې برابره ده.
د ملګرو ملتونو د راپور له مخې، افغانستان په آسیا کې د امیدواره میندو د مړینې له پلوه لوړه کچه لرونکی هېواد دی او په هرو ۱۰۰ زرو زېږونونو کې ۶۳۸ میندې ژوند له لاسه ورکوي.
طالبانو په تېرو نېږدې پنځو کلونو کې، ناروغانو ته د روغتیايي خدماتو وړاندې کولو برخه کې محدودیتونه لګولي دي.
په اوس وخت کې باید ښځینه روغتیايي کارکوونکې له نارینه (شرعي محروم) سره یو ځای روغتیايي مرکزونو ته لاړې شي او نارینه ډاکتران حق نه لري، چې د ښځینه ناروغانو درملنه وکړي.
