د Canadian North اکاډمۍ اعلان کړی، د طالبانو د مخالفینو هغه غونډه چې ټاکل شوې وه راتلونکې اوونۍ د آلمان فرانکفورت ښار کې جوړه شي، د ترانس جندر د فعالې غړې مهره ساغري د شتون له آمله لغوه او بل وخت ته ځنډول شوې ده.
رخشانه: دې آکاډمۍ تېره ورځ (دوشنبې د وري ۱۷ مه) ناوخته په یوه اعلامیه کې لیکلي، «دا غونډه د ترانس جندر په توګه د مهره ساغري د فردي هویت او شتون پر بنسټ، د یو شمېر مغرضه افرادو د مخالفت له آمله لغوه او بل وخت ته ځنډول شوې ده.»
د غونډې جوړونکي بنسټ لیکلي چې «په انساني کرامت، برابری او نه تبعیض ولاړو اصولو باندې ټینګار لري او د ټولنیز او فردي هویت پر بنسټ، هر ډول محدودیت د خپلو اساسي ارزښتونو سره په ټکر کې بولي.»
Canadian North آکاډمۍ زیاته کړې، دا غونډه به نېږدې راتلونکې کې، د مخکنیو مېلمونو او نویو څېرو په شتون کې، پر متقابل احترام ولاړې فضا او متوازنه نظریاتو وړاندې کولو سره جوړه شي.»
ټاکل شوې وه، دا غونډه د ۱۹ افغان سیاسي او مدني فعالانو، چې په کې به د ښځو د حقونو پنځه تنه فعالانې، له هغې جملې شکریه بارکزۍ، ژولیا پارسي، لیلا فروغ محمدي او فرح مصطفوي هم ګډون ولري، د روانې میلادي میاشتې په ۱۴ مه نېټه جوړه شي.
د ترانس جندر فعالې مهره ساغري د فرانکفورت غونډې لغوه کېدو ته په غبرګون کې په خپله اېکس پاڼه لیکلي، ټاکل شوې وه په دې غونډه کې د بشري حقونو د فعالې په توګه ګډون وکړي او د افغان ښځو د وضعیت، رنګین کمان ټولنې او جنسیتي توپیر په اړه خبرې وکړي.
هغې زیاته کړې: «په خواشینۍ سره، زه د خپل جنسي هویت په خاطر، له جنسیتي توپیر سره مخ شوم او د Canadian North آکاډمۍ همکاره بنسټ، زما د جنسي هویت په خاطر ما ته د خبرو کولو اجازه را نه کړه.»
د ترانس جندر دې فعالې په تېرو څلورو کلونو کې په وار وار د افغان ښځو د ملاتړ په پار، د طالبانو په وړاندې اعتراض کړی دی.
هغې دوه کاله وړاندې د آلمان برلین ښار کې د افغان ښځو، جنسیتي لږکیو او په هېواد کې د هزاره ګانو په وړاندې د بریدونو په غبرګون کې اعتراضي خېمه وهلې او د نه خوړو اعتصاب یې کړی وو.
