د افغانستان د بشري حقونو د چارو لپاره د ملګرو ملتونو ځانګړي راپور ورکوونکي ریچارد بنټ وايي، په زده کړو او د ښځینه روغتیايي کارکوونکو پر فعالیتونو د طالبانو محدودیتونو د افغانستان روغتیايي نظام کمزوری کړی دی.
رخشانه: بنټ نن (سه شنبې د وري ۱۸ مه) د روغتیا نړیوالې ورځې په مناسبت خپله اېکس پاڼه باندې لیکلي، افغانستان کې لا هم ښځې او نجونې روغتیايي خدماتو ته د لاسرسي برخه کې له ننګونو سره مخ دي.
بنټ زیاته کړې، په تګ راتګ، زده کړې او د ښځینه روغتیايي کارکوونکو پر فعالیتونو د طالبانو محدودیتونو روغتیايي نظام کمزوری کړی دی.
د افغانستان د بشري حقونو لپاره د ملګرو ملتونو ځانګړي راپور ورکوونکي ویلي، د افغانستان په روغتیايي سیستم د طالبانو محدودیتونه د هغه کسانو د مړینې سبب کېږي، چې د ناروغۍ یې د مخینوي وړ دي.
بنټ څه موده وړاندې هم په یوه راپور کې لیکلي وو، چې د طالبانو محدودیتونه روغتیايي پالنو ته د میندو پر وخت لاسرسي خنډ جوړېږي او په زیانونو د میندونو د اخته کېدو او مړینې کچه زیاتوي.
طالبانو په تېرو کابو پنځو کلونو کې، په روغتیايي مرکزونو کې، ناروغانو ته د روغتیايي خدماتو وړاندې کولو او ښځینه روغتیايي کارکوونکو پر فعالیتونو محدودیتونه لګولي دي.
دا مهال ښځینه روغتیايي کارکوونکي باید له خپل شرعي محرم سره، روغتیايي مرکزونو ته لاړې شي او نارینه روغتیاپالان حق نه لري، چې د ښځینه ناروغانو درملنه وکړي.
طالبانو د ښځینه روغتیايي کارکوونکو پر فعالیتونو د محدودیتونو سربېره، په هېواد کې د طبي انستېتیوتونو دروازې هم د نجونو پر مخ تړلې دي.
