د ماشومانو د ساتنې سازمان(Save The Children) ویلي، افغانستان کې د بارانونو او پراخو سېلابونو راوتو له آمله، د ماشومانو په ګډون له ۱۰۰ زیاتو کسانو ژوند بایللی دی.
رخشانه: دې بنسټ پرون (چهارشنبې د وري ۱۹ مه) ناوخته، په خپله اېکس پاڼه د یوه پوسټ په خپرولو سره لیکلي، سېلابونه په چټکۍ سره راځي او په څو ثانیو کې کولی شي د ماشومانو ژوند «لاندې» کړي.
د ماشومانو د ساتنې سازمان زیاته کړې، د «ماشومانونو د ژوند خوندي کولو لپاره بېړنیو اقداماتو ته اړتیا ده.»
له دوه اوونیو زیاته موده کېږي، چې په ټول هېواد کې بارانونه او د سېلابونو رواتل دوام لري.
طالبانو پرون اعلان کړی وو، چې د روان کال د وري میاشتې له شپږمې تر اوسه، په ټول هېواد کې د طبیعي پېښو له آمله ۱۴۸ تنو ژوند بایللی، ۲۱۶ تنه ټپیان او ۸ تنه نور ورک شوي دي.
د طالبانو په وینا، په دې موده کې لسګونه کورونه په بشپړه یا هم قسمي توګه ویجاړ شوي او سلګونه هکتاره کرنیزه ځمکه یې له منځه وړې ده.
دا په داسې حال کې ده، چې په راتلونکو ورځو کې هم په ټول هېواد کې د سختو بارانونو او سېلابونو راوتلو اټکل کېږي.
