د ملګرو ملتونو د بشري مېشتېدنې پروګرام (UN- Habitat) اعلان کړی، چې روان میلادي کال، افغانستان کې ۴.۲ میلونه وګړي بېړنۍ سرپناه او غیرخوراکي مرستو (د کور توکو) ته اړتیا لري.
رخشانه: دې بنسټ نن (پنشنبې د وري ۲۰ مه) په خپله اېکس پاڼه د یوه پوسټ په خپرولو سره لیکلي، وروستیو سېلابونو دغه اړتیا ان زیاته کړې هم ده.
د ملګرو ملتونو د بشري مېشتېدنې پروګرام زیاته کړې «دې موضوع ته د رسېدګۍ لپاره نه باید ځنډ رامنځ ته شي او هره کورنۍ د ژوند لپاره د امن ځای وړ دی.»
دې بنسټ په داسې حال کې د بې ځایه شویو کورنیو د ملاتړ لپاره د ګام پورته کولو غوښتنه کړې، چې سېلابونو سلګونه کورنه نړولي دي.
طالبانو اعلان کړی، چې هېواد کې د وروستیو سېلابونو له امله، یو زره او ۱۴۹ کورونه ویجاړ شوي او سلګونه جرېبه کرنیزه ځمکه هم له منځه تللې ده.
د طالبانو په وینا، د سېلابونو راوتلو پر ځای او مالي زیان سربېره اووه زره او ۵۰۰ کورنۍ د دې طبیعي پېښې تر اغېز لاندې راغلې دي.
پر طبیعي پېښو سربېره چې د خلکو د استوګنې څخه د بې ځایه کېدو سبب کېږي، د طالبانو او پاکستان تر منځ جګړې هم د هېواد سلګونه تنه بې ځایه کړي دي.
افغانستان کې د ملګرو ملتونو د بشري مرستو د همغږۍ دفتر (اوچا) څه موده وړاندې اعلان کړی وو، چې د طالبانو او پاکستان تر منځ د وروستیو نښتو له امله، د فبرورۍ میاشتې راهیسې تر اوسه پورې له ۹۴ زره زیات کسان چې کابو ۱۳ زره او ۴۰۰ کورنۍ کېږي، خپلو اصلي استوګنځایونو څخه بې ځایه شوي دي.
