طالبانو د روانې اوونۍ اوږدو کې، کابل، کاپیسا، زابل، فاریاب، پکتیا، غور، خوست او ننګرهار ولایتونو کې، د څلورو ښځو په ګډون ۳۲ تنه د بېلا بېلو تورونو له امله، د خلکو په وړاندې په دورو وهلي دي.
رخشانه: دا کسان د نامشروع اړیکې، الکولي مشروباتو، نشه کوونکو ګولیو او چرسو د پېر، پلور، قاچاق، له کوره د تښتې، غلا او اخلاقي فساد په تورونو په دغه ولایتونو کې په دورو وهلي دي.
شنبې د (وري ۱۵ مه) کابل کې یوه ښځه د نامشروع اړیکې په تور ۲۵ دورې وهل شوې او په یوه کال او شپږ میاشتې تنفذي بند هم محکومه شوې ده.
یکشنبې د (وري ۶ مه) د یوې ښځې په ګدون ۲۳ تنه کابل، کاپیسا او زابل، د بېلا بېلو تورونو له امله د خلکو په وړاندې په دورو وهل شوي دي.
۱۵ تنه کابل کې د الکولي مشروباتو، نشه کوونکو ګولیو او چرسو د پېر، پلور او قاچاق په تور له ۱۰ تر ۳۰ دورو وهل شوي او له اوو میاشتو تر درې کلونو پورې په تنفذي بند هم محکوم شوي دي.
د یوې ښځې په ګډون شپږ تنه د غلا او نامشروع اړیکې په تور، د سرپل ولایت کوهستانات ولسوالۍ کې د خلکو په وړاندې له ۲۹ تر۳۵ دورې وهل شوي او په دوه تر درې کاله تنفذي بند محکوم شوي.
دوه تنه د غلا او نامشروع اړیکې په تور د زابل شاجوی ولسوالۍ کې د خلکو په وړاندې له ۳۰ تر ۳۹ دورو وهل شوي او له یوه تر درې کلونو تنفذي بند محکوم شوي دي.
دوشنبې د (وري ۱۷ مه) د یوې ښځې په ګډون شپږ تنه د بېلا بېلو تورونو له امله، فاریاب، پکتیا او غور کې د خلکو په وړاندې په دورو وهل شوي دي.
یو تن د نامشروع اړیکې لرلو په تور د فاریاب چهل ګزي ولسوالۍ کې د خلکو په وړاندې ۳۰ دورې وهل شوی او په یوه کال تنفذي بند هم محکوم شوی دی.
درې تنه د غلا په تور د پکتیا ولایت زرمت ولسوالۍ کې د خلکو په وړاندې ۲۰ دورې وهل شوي او په شپږ میاشتې تنفذي بند هم محکوم شوي دي.
د یوې ښځې په ګډون دوه تنه د اخلاقي فساد په تور د غور ولایت مرکز کې ۳۹ دورې وهل شوي دي. معلومه نه ده، چې دې کسانو ته څومره موده بند اورول شوی دی.
چهارشنبې د (وري ۲۰مه) یوه ښځه له کوره د تېښتې په تور د خوست علي شېر ولسوالۍ کې د خلکو په وړاندې په دورو وهل شوې او په دوه کاله تنفذي بند محکومه شوې ده.
پنشنبې د (وري ۲۱ مه) یو تن د غلا په تور د ننګرهار سرخ رود ولسوالۍ کې د خلکو په وړاندې ۳۹ دورې وهل شوی او په یوه کال تنفذي بند محکوم شو.
طالبانو په تېرو پنځو کلونو کې په پرلپسې توګه په عام محضر کې د ټولو بشري حقونو او انساني کرامت خلاف بدني سزاوې پلې کړې او د ښځو په ګډون یې سلګونه تنه د هېواد په ګوټ ګوټ کې د خلکو په وړاندې په دورو وهلي دي.
دې ډلې په دې موده کې لږ تر لږه ۱۲ تنه د بېلا بېلو تورونو له آمله په هېواد کې د سلګونو نندارچیانو او ان ماشومانو په وړاندې اعدام کړي دي. طالبان په هغه تفسیر سره چې د اسلام له دین څخه یې لري، د افرادو بدني سزاوې روا بولي.
