د ملګرو ملتونو د ښځو څانګې (UN Women) اعلان کړی، چې منځني ختیځ کې د جګړو د سختېدو سره، د ښځو حقونو مدافعین له ګواښ، خپل سرو نیونو، زندان او ان مرګوني تاوتریخوالي سره مخ شوي دي.
رخشانه: دې بنسټ پرون (جمعه د وري ۲۱ مه) د یوې بیانیې په خبرولو سره منځني ختیځ کې د جکړو د سختېدو او پر ښځو او نجونو د هغو د اغېزو په اړه اندېښنه څرګنده کړې ده.
د ملګرو ملتونو د ښځو څانګې د ایران، امریکا او اسرائیلو تر منځ جګړو ته په اشارې ویلي، په دې جګړو کې د ښځو او نجونو په ګډون سلګونو تنو ته مرګ ژوبله اوښتې ده.
دې بنسټ د جګړې د ښکېلو غاړو تر منځ له دوه اوونیزه اوربنده هرکلی کړی او په سیمه کې یې تل پاتې سولې، د ښځو او نجونو حقونو خوندیتوب، امنیت او انساني کرامت ته د رسېدنې غوښتنه کړې ده.
د ملګرو ملتونو د ښځو څانګې ویلي، په منځني ختیځ کې د جګړو له امله، میلیونونه ښځې او نجونې د کورونو پرېښودو ته اړ شوې او دغه راز روغتیايي، ساتونکو او استوګنې سرچینو خدماتو ته د هغوی لاسرسی محدود شوی دی.
دې بنسټ زیاته کړې، د ښځو حقونو مدافع سازمانونه چې سیمه کې بشردوستانه او سولې جوړونې په غبرګونونو کې مهم رول لري، په داسې شرایطو کې فعالیت کوي، چې مدني چاپېریال د محدودېدو په حال کې دی، امنیتي ګواښونه مخ په زیاتېدو دي او بودیجې شدید کمښت شتون لري.
د ملګرو ملتونو د ښځو څانګې په وینا، منځني ختیځ کې د ښځو حقونو مدافعان، له ګواښ، خپل سرو نیولو، زندان او په ځینو مواردو کې له مرګوني تاوتریخوالي سره مخ دي.
سرچینه وايي، چې دوی په ټول منځني ختیځ کې فعال حضور لري او د خپلو ساتندویه، معشیتي او همغږي کوونکو ملاتړونو د پراخولو په حال کې دي او ډاډ تر لاسه کوي، چې د ښځو غږونه د غبرګونونو او بیارغونې پروسو کې مرکزي رول ولري.
دې بنسټ سیمه کې د تاوتریخوالي کمولو، د ملکي وګړو د خوندیتوب، بشري مرستو ته دې بې خنډه لاسرسي، د جنسیت پر بنسټ د بشري اقداماتو او د ښځو او نجونو لپاره د دوامداره سولې ترلاسه کولو غوښتنه کړې ده.
