په جلاوطنۍ کې یو شمېر افغان خبریالانو او د رسنیو فعالانو د یوه کمپاین په جوړلو سره، د طالبانو له زندانه د زنداني خبریالانو شکېب نظري، حمید فرهادي او بشیر هاتف د خوشي کېدو غوښتنه وکړه.
رخشانه: دا کمپاین تازه، په جلاوطنۍ کې د یو شمېر افغان خبریالانو او رسنیزو فعالانو له خوا په ټولینزو شبکو پیل شوی دی.
شکېب نظري، حمید فرهادي او بشیر هاتف د طالبانو له لوري له بهرنیو او په تبعید کې له یو شمېر افغان رسنیو سره د همکارۍ په تور د طالبانو له خوا په څو کاله بند محکوم شوي دي.
طالبانو شکېب نظري «له یوې جاپاني رسنۍ سره د همکارۍ» په تور په درې کاله بند محکوم کړی او حمید فرهادي یې «له اطلاعات روز ورځپاڼې سره د همکارۍ» په تور په دوه کاله زندان محکوم کړی دی.
د طالبانو له زندانه د دې درې خبریالانو د خوشي کېدو کمپاین په داسې حال کې پیل شوی، چې طالبانو په تېرو کابو پنځو کلونو کې، په هېواد کې په رسنیو او رسنیزو فعالیتونو سخت محدودیتونه لګولي دي.
طالبانو په هېواد کې پر رسنیز کار او لسګونه، غږیزو، تصویري او چاپي رسنیو د محدودیتونو تر څنګ، څو تنه خبریالان او د رسنیو فعالان نیولي او زنداني کړي دي.
د افغانستان د خبریالانو مرکز څه موده وړاندې د «کب ۲۷ مه د خبریال ملي ورځې» په مناسبت په یوه راپور کې ویلي، په ۱۴۰۴ لمریز کال کې، په هېواد کې د رسنیو له خپلواکۍ د سرغړونې او د خبریالانو په وړاندې د تاوتریخوالي لږ تر لږه ۲۰۷ پېښې ثبت شوې دي.
د خبریالانو د مرکز په وینا، په دې پېښو کې دوه وژنې او یو ټپي، ۱۸۳ ځلې ګواښل، له هغې جملې ۲۱ ځلې د خبریالانو او رسنیو د فعالانو نیول شامل وو.
د افغانستان د خبریالانو مرکز په خپل راپور کې نغوته کړې وه، چې طالبانو پر رسنیو کنټرول سخت کړی او په هېواد کې «ځپنه او سانسور» په بې مخینې توګه زیاتوالی موندلی دی.
د طالبانو د امربالمعروف قانون له مخې، په رسنیو کې د ساه کښو انځور خپرول حرام دي. د دې قانون پر بنسټ، په ۲۱ ولایتونو کې په رسنیو د ساه کښو انځور خپرول بند شوي او سیمه ییز تلوېزیونونه په راډیوګانو بدل شوي دي.
