د «ملي خبرو اترو ناستې» دویمه غونډه د افغانستان د یو شمېر سیاسي، ټولنیزو او مدني څېرو په ګډون، په آلمان کې جوړه او د افغان نجونو د زده کړې په حق په ټينګار سره پای ته ورسېده.
رخشانه: دا ناسته تېره ورځ (شنبې د وري ۲۲ مه) له ۶۰ د زیاتو افغان سیاسي، ټولنیزو او مدني څېرو په ګډون، د افغانستان د سولې کمېټې په کوربتوب جوړه شوې وه.
د دې بنسټ له لوري په خپره شوې اعلامیه کې راغلي، «ملي خبرې اترې، ټولنیز عدالت د زغم کلتور» د دې ناستې له اصلي محورونو وو.
د دې ناستې ګډونوالو په افغان ښځو او نجونو د طالبانو پراخو محدودیتونو ته اشاره کړې ویلي یې دي، دا محدودیتونه یو لوی ظلم او ملي ګټو ته نه جبرانېدونکي زیاتونه اړوي.
هغوی په دې ناسته کې د افغان نجونو پر زده کړه د محدودیت له دوام اندېښنه څرګنده کړه او ژمنه یې وکړه، چې «د افغان نجونو غږ به پورته کوي او د دې بې عدالتۍ په وړاندې به مبارزه کوي.»
دغه راز د ناستې کډونوالو د ټولنې پراختیا، ثبات او پایښت کې ښځو رول ته اشاره او ټینګار یې وکړ، چې « د عدالت له [پلي] کولو پرته سوله امکان نه لري.»
د افغانستان د سولې کمېټې ویلي، د دې ناستې په پای کې پرېکړه وشوه، چې د «پرېږدۍ افغان نجونې ښوونځي ته لاړې شي» په شعار سره ملي کمپیاین ژر پیل شي.
دا د ملي خبرو اترو دویمه ناسته وه، چې د دې بنسټ له لوري د افغان سیاسي، ټولنیزو او مدني څېرو په ګډون آلمان کې جوړه شوه. د ملي خبرو اترو مخکنی ناستې تېر کال د آلمان په یو شمېر ښارونو او نورو هېوادونو کې جوړې شوې وې.
د دې ناستې ګډونوالو په داسې حال کې زده کړې ته د افغان نجونو په لاسرسي ټینګار کړي، چې ۱۶۶۶ ورځې کېږي، چې هېواد کې له شپږم ټولګي بره نجونو پر مخ د ښوونځیو دروازې تړل شوې دي.
طالبانو په کابو تېرو پنځو کلونو کې، په هېواد کې د ښځو او نجونو په وړاندې د پراخو محدودیتونو سربېره، هغوی له خپلو لومړنیو بنسټیزو حقونو او خپلواکیو محرومې کړې دي.
دې ډلې د بشري حقونو د فعالانو، د بشريحقونو سازمانونو او نړیوالې ټولنې غوښتنې ته په نه پاملرنې، نه یوازې هېواد کې د ښځو او نجونو په وړاندې محدودیتونه لغوه کړي نه دي، بلکې لا یې سخت کړي دي.
