د ملګرو ملتونو د ښځو څانګې (UN Women) په یوه راپور کې ویلي، د طالبانو او پاکستان تر منځ جګړو، تر ټولو ډېر زیان افغان مېرمنو او ماشومانو ته رسېدلی دی.
رخشانه: دې بنسټ پرون (یکشنبې د وري ۲۳ مه) د جنسیتي خبرداري ۲ شمېر تر عنوان لاندې راپور کې، د افغان ښځو او نجونو په ژوند، د طالبانو او پاکستان تر منځ جګړو اغېز څېړلی دی.
په دې راپور کې راغلي، د طالبانو او پاکستان تر منځ د نښتو له پیله، د ۲۰۲۶ میلادي کال د فبرورۍ له وروستیو شاوخا ۹۰ زره کسانو له دې جګړو زیان لیدلی، چې له ۵۲ سلنې زیات یې ښځې او نجونې دي.
راپور کې راول شړي، له زیانمن شویو ښځو اته سلنه یې د کورنیو سرپرستانې دي او د «سرپناه، روغتیا او د خوړو خوندیتوب» لاسرسي ته اړتیا لري.
د ملګرو ملتونو د ښځو څانګې ویلي، د دواړو لورو تر منځ د جګړو له سختېدو راهیسې، خوړو، سرپناه، روغتیايي خدماتو او ښځو ته ځانګړي شوي چاپېریال ته د ښځو لاسرسی محدود شوی دی.
دې بنسټ له جګړې زیانمن شویو ښځو ته د نغدي، خوړو، غیرخورکي توکو د مرستو او روغتیايي خدماتو د رسولو غوښتنه کړې ده.
د ملګرو د ښځو څانګې همدارنګه ویلي، د طالبانو او پاکستان تر منځ له جګړو، ۶۰ سلنه زیانمن شوې ښځې او سړي د «نه خونديتوب احساس» کوي.
د دې بنسټ په راپور کې راغلي، د ښکېلو اړخونو تر منځ د جګړو له پیل وروسته، «ښځو کې د وېرې، بې خوبۍ، وېروونکو خوبو او له غږ سره د حساسیت راپور ورکړل شوی دی، رواني – ټولنیز ملاتړ ته لاس رسی هم محدود دي.»
ملګرو ملتونو راپور ورکړی، ډېری کورنۍ، چې له دې وړاندې د زلزلې له آمله بې ځایه شوې وې، د جګړو له آمله بیا کډوال شوې. په کونړ او ننګرهار کې یو په درېیمه برخه مېرمنو دواړه بحرانونه تجربه کړي، پرلپسې کډوالۍ ښځې بېرته نا خوندي او له خدماتو پرته سیمو ته ورتګ ته اړباسي.
د ملګرو ملتونو د راپور له مخې، له محرم پرته کورنیو سرپرستې ښځې، له چک پانټونو او وسله والو کسانو له شتون سخت استرس او وېرې لري.
ملګرو ملتونو «د کورنیو له سرپرستو او بې محرمه ښځو لپاره د ځانګړي ملاتړ، د ښځو د خدماتو د دوام لپاره له طالبانو سره د سلا مشورې، بازارونو ته د مېرمنو د لاسرسي ارزونې او د ښځو تر سرپرستۍ لاندې کورنیو ته د نغدي مرستو د وېش» غوښتنه کړې ده.
افغانستان کې د ملګرو ملتونو د بشري مرستو د همغږۍ دفتر (اوچا) تېره اوونۍ اعلان وکړ، چې د طالبانو او پاکستان تر منځ د وروستیو جګړو له امله، د ښځو او ماشومانو په ګډون سلګونه کسانو ته مرګ ژوبله اوښتې ده.
طالبانو هم اعلان کړی، چې د دوی د ډلې او پاکستان تر منځ جګړو کې د فبرورۍ له ۲۲ مې د اپرېل تر ۳ مې پورې ۷۶۱ تنه په هېواد کې وژل شوي دي.
د طالبانو او پاکستان تر منځ جګړه له یوې میاشتې راهیسې دوام لري. دا جګړې پر داسې مهال دوام لري، چې د دواړو لورو استازو په دې وروستیو ورځو کې، د جګړې د درېدو او تاوتریخوالي د کمښت لپاره چین کې خبرې اترې وکړې.
