د «افغان ښځو د پیاوړتیا غورځنګ» د طالبانو له بندخونو د خبریالانو خوشي کولو کمپاین کې په ګډون سره ویلي، افغانستان کې د خبریالانو نیونه باید ودرول شي.
رخشانه: د دې اعتراضي غورځنګ غړو نن (سه شنبې د وري ۲۵ مه) په یوه بیانیه کې د طالبانو په زندانونو کې د خبریالانو د وضعیت په اړه اندېښنه ښودلې ده.
په دې وروستیو کې، یو شمېر جلا وطنه خبریالانو او رسنیزو فعالانو د یوه کمپاین په ترڅ کې، له طالبانو سره د بندي خبریالانو، شکېب نظري، حمید فرهادي او بشیر هاتف د خوشي کولو غوښتنه کړې ده.
معترضو مېرمنو ویلي، د رسنیزو فعالیتونو او د خلکو د غږ معکس کولو له آمله، د خبریالانونو نیونو، د بیان آزدۍ، بشري حقونو او خبریالانو د امنیت په اړه جدي اندېښنې راپورته کړي دي.
طالبانو شکېب نظري «له یوې جاپاني رسنۍ سره د همکارۍ» په تور په درې کاله بند او حمید فرهادي «له اطلاعات روز ورځپاڼې سره د همکارۍ» په تور په دوه کاله بند محکوم کړي دي.
د افغان ښځو د پیاوړتیا غورځنګ، له ملګرو ملتونو، د بشري حقونو له نړیوالو بنسټونو او اړونده سازمانو غوښتي، چې دې موضوع ته لومړیتوب ورکړي او د طالبانو له زندانونو د بندي خبریالانو د خلاصون لپاره جدي او بېړني ګامونه پورته کړي.
طالبانو په تېرو کابو پنځو کلونو کې، په هېواد کې په رسنیو او رسنیزو فعالیتونو سخت محدودیتونه لګولي دي.
دغه ډله د محدودیتونو په لګولو سره په هېواد کې د لسګونه غږیزو، تصویري او چاپي رسنیو د د بندېدو لامل شوي او څو تنه خبریالان او د رسنیو فعالان یې نیولي او زنداني کړي دي.
د افغانستان د خبریالانو مرکز د راپور له مخې، یوازې ۱۴۰۴ لمریز کال په هېواد کې د رسنیو له خپلواکۍ د سرغړونې او د خبریالانو په وړاندې د تاوتریخوالي لږ تر لږه ۲۰۷ پېښې ثبت شوې دي
