افغانستان کې د ملګرو ملتونو د استازولۍ دفتر (UN) وايي، طالبانو د ۲۰۲۵ له سپټمبر راهیسې په څو ځایونو کې دې بنسټ پورې تړلو دفترونو ته، د ملګرو ملتونو د ښځینه کارکوونکو لاسرسی محدود کړی دی.
رخشانه: ملګرو ملتونو (چهارشنبې د وري ۲۶ مه) په خپل کلني راپور کې ویلي، د طالبانو له لوري په ځینو ځایونو کې د ښخینه کارکوونکو لرې کولو په محدودیتونو سره، د مرستو وړاندې کول ګډوډ کړي او خدماتو ته د ښځو لاسرسی یې کم کړی دی.
په دې راپور کې راغلي، د طالبانو محدودیتونه ځواب ویوونکو پروګرامونو ته د اړمنو ښځو د لاسرسی د محدودېدو لامل شوي او د کورنیو سرپرستو مېرمنو، له ګاونډیو هېوادونو راستنو شویو ښځو او نجونو ته یې ګواښونه زیات کړي دي.»
راپور کې راوړل شوي، افغانستان په ۲۰۲۵ کال کې د بهرنیو مرستو د کمېدو، د کډوالو راستنېدو، له پاکستان سره په پوله د ستونزو، اقلیمي بدلونونو او په ټولنه او کار کې پر ښځو د طالبانو د محدودیتونو سره مخ وو. د ملګرو ملتونو په وینا، دې ستونزو په کورنیو، بازارونو او ټولنیزو خدماتو فشارونه زیات کړي دي.
ملګرو ملتونو په ۲۰۲۵ کې له افغانستان سره د نړیوالو مرستو کمېدو ته په اشارې لیکلي، په دې هېواد کې شاوخوا ۲۲.۹ میلیونه وګړي، بشري مرستو ته اړتیا درلوده.
د ملګرو ملتونو په راپور کې راغلي، په ۲۰۲۵ میلادي کال کې شاوخوا ۲.۷۸ میلیونه افغان کډوال له ایران او پاکستان څخه افغانستان ته راستانه شوي، چې ډېری یې ښځې او ماشوم دي.
ملګرو ملتونو د ۲۰۲۵ د اګست په ۳۱ مه د افغانستان په ختیځ کې شوې زلزلې ته اشاره کړې وايي، د دې طبیعي پېښې په ترڅ کې، له ۱۹۹۲ زیات کسان وژل شوي او ۳۶۳۱ تنه نور ټپیان شوي دي.
د یاد سازمان د راپور له مخې، د دې طبیعي پېښې په ترڅ کې له ۸۲۰۰ زیات د استوګنې کورونه ویجاړ یا زیانمن شوي، چې له آمله یې زرګونه کورنۍ کډه او اساسي خدماتو او بازارونو ته لاسرسی ګډوډ شوی دی.
ملګرو ملتونو په خپل راپور کې لیکلي، په ۲۰۲۵ کال کې په افغانستان کې بشري مرستو ته اړتیاوې لا هم پورته وې. بېوزلۍ، اقلیمي بدلونونو، ماینونو او د کډوالو راستنېدو، ستونزې لا زیاتې کړې او محدودیتونو د مرستو رسول سخت کړي دي
