ننګرهار کې سیمه ییز طالب چارواکي وايي، د دې ولایت نازیان ولسوالۍ کې یوې، ماشومې نجلۍ د اوبو ډنډ ته تر لوېدو وروسته ژوند له لاسه ورکړی دی.
رخشانه: ننګرهار کې د طالبانو د امنیه قوماندانۍ ویاند سید طیب حماد وايي، دغه پېښه پرون (چهارشنبې د وري ۲۶ مه) د نازیان ولسوالۍ په «بري لنډ» سیمه کې رامنّځ ته شوې ده.
هغه ویلي، دا ماشومه نجلۍ لس کلنه وه او د اوبو ډنډ ته تر لوېدو وروسته یې ژوند بایللی دی.
د سیمې دوو تنو اوسېدونکو د هویت پټ ساتلو سره رخشانې رسنۍ ته ویلي، دا پېښه هغه مهال رامنځ ته شوې، چې دې ماشومې نجلۍ خپل کور ته نېږدې د اوبو لېږدولو په حال کې وه، چې ناڅاپي د اوبو ډنډ ته ورولوېده.
د هغوی په وینا، دا ماشومه نجلۍ له ډوبېدو نېږدې په ځنډ له اوبو پیدا شوې، خو هغه مهال یې ژوند له لاسه ورکړی وو.
طالبانو له خلکو غوښتي، چې د دې ډول پېښو د مخینوي لپاره، خپل ماشومان د اوبو ډنډونو او خطري ځایونو ته له لېږلو راوګرځوي.
په ورته وخت زابل کې د طالبانو امنیه قومانداني هم وايي، د دې ولایت ارغنداب ولسوالۍ کې د یوې نهه کلنې نجلۍ، چې په اوبو کې ډوبه شوې وه، مړی یې په کندهار ولایت کې موندل شوی دی.
دا ماشومه نجلۍ دوه ورځې وړاندې (سه شنبې د وري ۲۵ مه) د زابل ولایت ارغنداب ولسوالۍ کې په اوبو کې ډوبه شوې وه او مړی یې پرون د کندهار په شاولي کوټ ولسوالۍ کې موندل شوی دی.
