افغانستان کې د ملګرو ملتونو د وګړو ملاتړي صندوق (UNFPA) ویلي، افغانستان کې ډېری نجونې د میاشتني عادت پر مهال د حفظ الصحې کمو توکو ته لاسرسی لري.
رخشانه: دې بنسټ پرون (یکشنبې د وري ۳۰ مه) ناوخت په یوه اعلامیه کې لیکلي، د میاشتني عادت د حفظ الصحې څخه ملاتړ، د ځوانونو نجونو پر ځان باور زیاتوي.
د ملګرو ملتونو د وګړو صندوق وايي، دوی په افغانستان کې د تنکیو نجونو لپاره د میاشتني عادت د حفظ الصحې مدیریت کټونو کارولو، وېش او پوهاوي په اړه د غونډو جوړولو ملاتړ کوي.
دې بنسټ ویلي، دوی په خپلو غونډو کې د فردي حفظ الصحې، د هغې د کېټونو د خوندي کارونې او د سیمه ییزو شرایطو سره سم د مناسب عادت د روغتیايي مدیریت د اهمیت په اړه مهم معلومات چمتو کوي.
ملګرو ملتونو د سرپل ولایت د یوې نجلۍ له قوله، چې د میاشتني عادت د حفظ الصحې د مدیریت په اړه یې د پوهاوي په غونډو کې برخه اخیستې وه ویلي: «مخکې مې د شرم او ناارامۍ احساس کاوه، تر ډېره به مې ښوونځي ته له تګ او په کارونو کې له ګډون کولو ډډه کوله، ځکه نه پوهېدم، چې د خپل میاشتني عادت دوره څه ډول مدیریت کړم.»
دې نجلۍ د پوهاوي په غونډو کې له ګډون وروسته ویلي، په ځان باور یې د پام وړ زیات شوی او اوس کولی شي په فعاله توګه په مختلفو ورځینو فعالیتونو کې له کوم خنډ پرته برخه واخلي.
د ملګرو ملتونو د وګړو صندوق زیاته کړې، د پوهاوي اغېزمن لوړول او د حفظ الصحې اړینو توکو ته لاسرسی د تنکیو نجونو د روغتیا، غزت او ټولنیز ګډون د ښه کولو لپاره خورا مهم دي.
دې بنسټ ټینګار کړي، چې د دې ملاتړو له لارې نجونې ځواکمنې شوې، چې پر ننګونو بریالۍ شي او په خپل ځان په باور کولو سره کولی شي، خپله روغتیا مدیریت کړي.
د افغانستان د بشري حقونو د چارو لپاره د ملګرو ملتونو ځانګړي راپور ورکوونکي ریچارد بنټ څه موده وړاندې په یوه راپور کې لیکلي وو، چې ښځې او نجونې د روغتیا په ساتنه او د میاشتي عادت د حفظ الصحې برخه کې له جدي ستونزو سره مخ دي.
نوموړي د «په افغانستان کې روغتیا ته د ښځو او نجونو ته د لاسرسي حق» په راپور کې زیاته کړې وه، بېوزلي روغتیايي توکو ته لاسرسی محدودوي او ډېرې د نامناسبه توکو کارولو ته اړباسي، چې دا د انتان ګواښ زیاتوي.
د بنټ په وینا، ډېری ښځې او نجونې د حفظ الصحې د ساتلو په نشتوالي کې شرم احساسوي، کوم چې د ټولنیزې انزوا او رواني فشارونو لامل کېږي.
بنټ لیکلي وو، د طالبانو محدودیتونو په عامه ژوند او د مور روغتیا، کورني پلان جوړونې، د میاشتني عادت حفظ الصحې، خوړو او نورو مهمو مسلو په اړه ښوونیز او پوهنیزو پروګرامونو کې د ښځو ګډون خورا کم کړی دی.
