جوزجان کې سیمه ییز طالب چارواکي وايي، د دې ولایت مرکز شبرغان ښار کې یوه ښځه د خپل خاوند له خوا وژل شوې ده.
رخشانه: جوزجان کې د طالبانو د امنیه قوماندانۍ ویاند عبدالستار حلیمي سیمه ییزه رسنیو ته ویلي، دا ښځه د یکشنبې په شپه د (وري ۳۰ مه) د شبرغان ښار د «مصرآباد» په سیمه کې وژل شوې ده.
نوموړي زیاته کړې، دا ښځه په خپل کور کې د خپل خاوند له خوا د «ناموسي مسایلو» پر سر په چړو وژل شوې ده.
طالبانو د دې ښځې د هویت او عمر په اړه څه نه دي ویلي.
جوزجان کې د طالبانو د امنیه قوماندانۍ ویاند وايي، د دې ښځې خاوند او یو بل سړی د «نامشروع اړیکې» په تور نیول شوي دي.
د ۲۰۲۱ اګست کې واک ته د طالبانو تر بیا رسېدو وروسته، د ښځو او نجونو د ځان وژنې او وژنو پېښې بې مخینې زیاتې شوې دي.
هېواد کې هر کال لسګونه ښځې او نجونو د هغه څه په دلیل چې «ناموسي مسایل» بلل کېږي، د خپلو کورنیو د غړو او خپلوانو له خوا وژل کېږي.
