د «افغان ښځو د آزادۍ د لارې غورځنګ» غړې وايي، پاکستان کې د افغان کډوالو، په ځانګړې توګه د ښځو، ماشومانو او بشري حقونو د فعالانو نیول، ځورونه او په زور ایستل، د کډوالۍ د نړیوالو ژمنو سرغړونه ده.
رخشانه: د دې اعتراضي غورځنګ غړو نن (سه شنبې د غوايي اوله) په یوه اعلامیه کې پاکستان کې د افغان کډوالو نیول، ځورول او په زور ایستل په کلکه غندلي دي.
اعلامیه کې راغلي، ډېری له دې کسانو د امنیتي ګواښونو، تاوتریخوالي، تعقیب او طالبانو د سختو محدودیتونو له آمله هېواد پرېښودو ته اړ شوي دي.
معترضو ښځو ویلي، خپل سرې نیونې، غیرانساني چلندونه او په زور ایستل د بشري حقونو او کډوالۍ د نړیوالو اصولو څخه ښکاره سرغړونه ده.
دوی هېواد ته د افغان کډوالو د ایستلو د پایلو په تړاو خبرداری ورکړی وايي، دا چلند «د زرګونو انسانانو ژوند د ایستلو خطر څخه نه خوندیتوب، زندان، ربړونې او ان د مرګ سره مخ کوي.»
د افغان ښځو د آزادۍ د لارې غورځنګ د پاکستان له دولت او نړیوالو بنسټونو غوښتي، چې د افغان کډوالو د نیولو او جبري استلو لړۍ ودروي.
همدارنګه دوی د پاکستان له دولته غوښتي، چې خپلو انساني او نړیوالو ژمنو ته ژمن پاتې شي او د کډوالو وضعیت ته د رسېدګۍ لپاره د ساتنې خوندیتوب او عدالت زمینه برابره کړي.
معترضو ښځو دې «انساني بحران ته نه پاملرنې» ته په اشارې او د طالبانو تر واک لاندې افغانستان ته د بشري حقونو د فعالانو د ایستلو د نه جبرانېدونکو پایلو په اړه خبرداری ورکړی دی.
د ۲۰۲۱ په اګست کې واک ته د طالبانو تر بیا رسېدو وروسته، د پخواني حکومت ډېری نظامیان، دولتي کارکوونکي، خبریالان او د بشري حقونو فعالان ګاونډیو هېوادونو ته کډوال شول، تر څو د کډوالو منننونکو هېوادونو وېزې تر لاسه کړي.
ډېری له دغه کډوالو چې د کوربه هېوادونو له خوا بېرته افغانستان ته ستانه کړای شوي، د طالبانو له لوري نیول شوي او زنداني شوي دي او نور پناه غوښتونکي، تل د طالبانو تر واک لاندې افغانستان ته د ایستلو د ګواښ په اړه اندېښنې څرګندوي.
