د افغانستان د بشري حقونو لپاره د ملګرو ملتونو ځانګړی راپور ورکوونکی ریچارد بنټ وايي، د افغان وګړو د ایستلو په تړاو د خبرو لپاره د اروپايي ټولنې له خوا د طالب چارواکو کوربتوب سخت اندېښمنوونکی دی.
رخشانه: بنټ نن (چهارشنبې د غوايي ۲ مه) په خپله اېکس پاڼه د یوه پوسټ په خپرولو سره لیکي، د طالبانو تر ولکې لاندې افغانستان کې د ښځو، بشري حقونو د مدافعینو او مخکني دولت د کارکوونکو په وړاندې د بشري حقونو څخه پراخې سرغړونې دوام لري.
هغه لیکلي: «هر ډول ستنول کولی شي، د اجباري نه ستنولو د اصل څخه سرغړونه شي.»
بنسټ زیاته کړې، د [طالبانو تر واک لاندې افغانستان کې] د بشري حقونو سرغړونې، له هغې جملې، د ښځو، د بشري حقونو د مدافعینو او پخوانیو دولتي کارکوونکو په وړاندې دوام لري.
د فرانسې خبري آژانس راپور ورکړی، چې ټاکل شوې راتلونکې اوونۍ یو طالب پلاوی د افغان کډوالو د ستنولو په اړه د خبرو اترو لپاره بروکسل ته سفر وکړي.
راپور راوړي، اروپايي ټولنې تر اوسه طالب چارواکو ته رسمي بلنه نه ده لېږلې.
د اروپايي ټولنې کابو ۲۰ غړي هېوادونه د افغان کډوالو په ځانګړې توګه د هغو کسانو چې په جرمونو محکوم شوي د ایستلو لپاره لارې ګودرې لټوي.
د اروپايي ټولنې دې پرېکړې اندېښنې راپارولي دي. د بشري حقونو بنسټونه وايي، افغانستان له انساني بحران سره مخ دی، چې وچکالۍ او د بهرنیو مرستو کمېدو لا ډېر کړی دی.
د دې بنسټونو په وینا، د طالبانو تر واک لاندې افغانستان، د پناه غوښتونکو د اجباري اخراج لپاره خوندي نه دی، ځکه دې ډلې په څرګنده توګه بشري حقونه تر پښو لاندې کوي.
طالبانو تر اوسه په دې اړه څه نه دي ویلي
