د بشري حقونو څار ډله وايي، د پاکستان او طالبانو تر منځ تازه جګړو په ترڅ کې، دغه هېواد د افغان کډوالو خپل سرې نیونې او جبري ایستل ګړندي کړي دي.
رخشانه: دې بنسټ نن (چهارشنبې د غوايي ۲ مه) په یوه اعلامیه کې لیکلي، د پاکستاني پولیسو عملیات د دې لامل شوي، چې زرګونه افغان کډوال، له هغې جملې ماشومان روغتیايي خدماتو، زده کړې او نور اساسي خدماتو ته د لاسرسي برخه کې له جدي ستونزو سره مخ شي.
د بشري حقونو څار ډلې د آسیايي څانګې څېړونکې فرشته عباسي ويي، پاکستاني چاروکو، د دې پر ځای چې له افغان کډوالو سره د اړمنو د ملاتړ کوونکو په توګه نېک چلندو وکړي، د هغوی تر منځ یې وېره خوره کړې ده.
هغې زیاته کړې: «د پولیسو ناوړه چلندونه، کډوال دې ته اړ باسي چې له خوړو او روغتیايي خدماتو ډډه وکړي. افغانستان ته په پراخه توګه د هغوی ایستل، ښايي د دې سبب شي، چې هغوی له ځورولو او لا بدو شرایطو سره مخ شي.»
د بشري حقونو څار ډلې لیکلي، د طالبانو او پاکستان تر منځ د جګړو سختېدو سره، د ۲۰۲۶ له فبرورۍ میاشتې راهیسې، پاکستان پولیسو د افغان کډوالو د نیولو او ایستلو لړۍ په څو ښارونو کې پراخه کړې او د کور په کور تلاشیو، د شپې پلټنو او له حکم پرته نیونو یې لاس پورې کړی دی.
د دې بنسټ په وینا، پاکستاني پولیس ان د باوري وېزو لرونکي ګډوال هم د اسناد نه لرونکو کسانو سره یو ځای نیولي دي.
د بشري حقونو څار ډلې زیاته کړې، یوازې په ۲۰۲۶ کال کې له ۱۴۶ زره زیات افغان کډوال له پاکستانه ایستل شوي او دا شمېره د اپرېل میاشتې له لومړیو زیاته شوې ده.
دې بنسټ ټینګار کړي، چې ډېری ګډوال له هغې جملې خبریالان، د بشري حقونو مدافعین او مدني فعالان، په مخکي دولت کې د خپل تېر فعالیت او پر طالبانو د نیوکو له امله، ښايي افغانستان ته د تګ په صورت کې له جدي ګواښ سره مخ شي.
د بې پولې خبریالانو سازمان هم راپور ورکړیو چې د ۲۰۲۶ کال له پیل راهیسې پاکستانی پولیسو لږ تر لږه ۹ تنه افغان خبریالان، چې ځینو یې معتبرې وېزې هم درلودې، په اجباري توګه افغانستان ته ستانه کړي دي.
د بشري حقونو څار ډلې همدارنګه ویلي، پاکستان کې افغان کډوال نه شي کولی، له باوري وېزو لرلو پرته، روغتیايي مرکزونو او خدماتو ته لاسرسی ولري.
د دې بنسټ په وینا، له نیولو وېره د دې لامل شوې، چې کورنۍ روغتیايي خدماتو ته له ورتګه ډډه وکړي او دې وضعیت د هغوی بدني او رواني روغتیا لا خرابه کړې ده.
د بشري حقونو څار ډلې زیاته کړې، ډېری افغان کورنۍ د نیولو څخه د مخینوي په موخه، خپل ماشومانو په کورونو کې ایسار کړي دي.
د افغان کډوالو د نیولو او ایستلو لړۍ د ۲۰۲۵ میلادي کال د اکتوبر میاشتې په منځ کې د پاکستان او طالبانو د جګړو تر سختېدو وروسته، ګړندۍ شوې ده.
د بشري حقونو څار ډلې ویلي، ځینې ایستل شوې کورنۍ، چې د پولې په اوږدو کې د افغانستان د ننه په پنډغالو کې مېشت شوې، په سختو شرایطو کې ژوند کوي. خواړه، روغتیايي خدمات او سرپناه هلته محدوده ده. ښخې او نجونې د تګ راتګ په برخه کې له سختو محدودیتونو سره مخ دي.
دې بنسټ ویلي، د ۲۰۲۳ کال په اکتوبر میاشت کې د ایستلو څپه د دې لامل شوې، چې ۵.۴ میلیونه افغان وګړي له ایران او پاکستان څخه افغانستان ته ستانه کړي.
د بشري حقونو څار ډلې زیاته کړې، د پاکستان له لوري د افغان کډوالو په زور ایستل او ستانه کول، ښايي د ملګرو ملتونو د نه ربړونې کنوانسیون او همدارنګه د نړیوال قانون دودیزه اصل چې «د کډوالو په زور ستنول» یې منع کړي، د دغه هېواد له کړو ژمنو سرغړونه وي.
د بشري حقونو د څار ډلې د آسیايي څانګې څېړونکې فرشته عباسي وايي، «پاکستان باید د خپلو پولیسو د ناوړه چلندونو په وړاندې اقدام وکړي او سمدستي د افغان کدوالو په زور ایستلو لړۍ ودروي.
هغې زیاته کړې: «ټول دولتونه هم باید په دې اړه خپلې اندېښنې د پاکستان له دولت سره مطرح کړي او همدارنګه په افغنستان کې د بشري حقونو دوامداره سرغړونې وغندي.
