بادغیس کې سیمه ییز طالب چارواکي وايي، د دې ولایت بالامرغاب ولسوالۍ کې د سېلابونو راوتلو له امله، د یوې ښځې په ګډون پنځو تنو ژوند بایللی دی.
رخشانه: بادغیس کې له طبیعي پېښو سره د طالبانو د مبارزې رییس باري داد صابر ځايي رسنیو ته ویلي، دې کسانو د چهارشنبې په شپه (د غوايي ۲ مه) د راوتلو سېلابونو له امله ژوند له لاسه ورکړی دی.
صابر وايي، د دې پېښې له قربانیانو درې تنه د یوې کورنۍ غړي وو.
نوموړي د دې طبیعي پېښې د قربانیانو د هویت، عمر او جنسیت په اړه څه نه دي ویلي.
هغه زیاته کړې، چې د دې سېلابونو له امله ۳۰ د استوګنې کورونه، لسګونه جرېبه کرنیزه ځمکه او کروندې هم ویجاړې شوې دي.
د ده په وینا، دا لومړنۍ شمېرې دي او ښايي د مالي او ځاني زیاتونه کچه لوړه شي.
په ورته وخت غور کې سیمه ییزه سرچینو هم ویلي، د تېرې شپې په سېلابونو کې د دې ولایت ساغر ولسوالۍ شاوخوا ۱۰۰ کورونه هم زیانمن شوي دي.
