د افغانستان لپاره د اروپايي ټولنې ځانګړي استازي ژیل برتران، کابل ته د خپل پنځه ورځني سفر په پای او له طالب چارواکو سره تر لیدونو وروسته، د دې ډلې له خوا په هېواد کې، د ښځو او نجونو په وړاندې د دې ډلې د محدودیتونو پر دوام اندېښنه وښوده.
رخشانه: افغانستان کې د اروپايي ټولنې استازولۍ پرون ناوخته (چهارشنبې د غوايي ۲ مه) په یوه اعلامیه کې لیکلي، برتران په دې سفر کې له طالب چارواکو، ملګرو ملتونو او نورو ټولو سازمانو له استازو، د افغانستان او غیر دولتي سازمانونو له مدني فعالانو سره کتنې او د نظر تبادلې درلودې.
د اروپايي ټولنې استازولۍ په اعلامیه کې راغلي، ځانګړي استازي یو ځل بیا پر ښځو او نجونو د لګولو شویو محدودیتونو، له هغې جملې زده کړو، کار او عمومي ژوند ته د لاسرسي په محدودیت د اروپايي ټولنې سخته اندېښنه تکرار کړه.
د افغانستان لپاره د اروپايي ټولنې ځانګړي استازي، دغه محدودیتونه د نړیوالو بشري حقونو او د افغانستان د نړیوالو ژمنو د معیارونو څخه جدي سرغړونه وبلله.
هغه د افغانستان په ټولنه او اقتصاد د ښځو او نجونو په وړاندې د طالبانو د اوږد مهاله او ویجاړونکو محدودیتونو د پایلو په اړه خبرداری ورکړی وايي، د [دې محدودیتونو] جبران به نسلونه وخت ونیسي.
ژیل برتران زیاته کړې، افغانستان یوازینی هېواد دی، چې په کې له شپږم ټولګي بره نجونې له زده کړو بندې شوې دي.
هغه پر دوام خبرداری ورکړ، چې د افغان ښځو او نجونو د زده کړې په وړاندې د طالبانو محدودیتونه د اړیکو عادي کولو په برخه کې لوی خنډ دی.
نوموړي همدارنګه ټینګار کړی، چې مرستې باید د یوې اصولي کړنلارې پر بنسټ چمتو کېږي، چې ډاډ ورکوي، ښخې هم د اصلي تر لاسه کوونکو په توګه او هم د مرستو په پلي کولو کې رول ولري.
برتران ژمنه وکړه، چې د بې ځایه شویو وګړو د روغتیا، زده کړې، زغم او ژوند برخو کې به د اروپايي ټولنې ملاتړ دوام ولري.
د افغانستان لپاره د اروپايي ټولنې ځانګړي استازي له ایران او پاکستان نه د افغان کډوالو د راستنېدو په اړه هم خبرې او ټینګار وکړ، چې دا ستنېدنه باید خوندي، په عزت او منظمه وي.
