د ملګرو ملتونو سازمان (یوناما) افغانستان کې د نجونو پر زده کړې د طالبانو له خوا د لګول شوي محدودیت څلورنیم کلونو تېرېدو ته په اشارې ویلي، د افغان نجونو یو نسل لا هم ښوونځي ته له تګه بې برخې دی.
رخشانه: دې بنسټ نن (پنشنبې د غوايي ۳ مه) د نجونو د معلوماتو او اړیکو مهارتونو د نړیوالې ورځې په مناسبت، په خپله اېکس پاڼه د یوه پوسټ په خپرولو سره، د افغان نجونو په وړاندې د زده کړې د محدودیتونو لغوه کولو غوښتنه کړې ده.
یوناما لیکلي دي، «زده کړې په ځانګړې توګه د معلوماتو او ټکنالوژۍ په برخه کې، د کار تر لاسه کولو، نوښتونو او باثباته افغانستان تر لاسه کولو کیلي ده.»
د ملګرو ملتونو عملي، کلتوري او ښوونیز سازمان (یونسکو) هم نن سهار په خپله اېکس پاڼه د یوه پوسټ په خپرولو سره لیکلي، نجونې یو ځل بیا د ریاضیاتو په برخه کې د شا تګ په حال کې دي.
یونسکو د معلوماتو او مخابراتي ټکنالوژۍ په نړیواله ورځ، د نجونو د وړتیاوو د بشپړ درک لپاره د بېړني اقدام پر اهمیت ټينګار کړی دی.
د معلوماتو او اړیکو د مهارتونو برخه کې د نجونو نړیواله ورځ یوه نړیواله پېښه ده، چې هر کال د «مهارتونو حوزې ته د داخلېدو، د ICT معلوماتو او اړیکو سکتور کې د کاري فرستونو په اړه د پوهاوي برخو کې د ځوانو ښځو او نجونو د هڅونې او د ټیکنالوژۍ په برخه کې د جنسیتي تشې کمولو» په موخه جوړېږي.
دا ورځ په نړۍ کې په داسې حال کې لمانځل کېږي، چې افغان ښځې او نجونې د نورو محدودیتونو سربېره، له تېرو څلورنیمو کلونو راهیسې د طالبانو د محدودیتونو له امله، له زده کړو او تحصیل څخه بې برخې دي.
