هرات کې سیمه ییزې سرچینې وايي، د دې ولایت «ګذره» ولسوالۍ کې، یوه ښځه د «رسۍ لوبې» په دلیل د خپل مېړه له خوا په بې رحمه ډول وژل شوې ده.
رخشانه: ګذره ولسوالۍ کې لږ تر لږه درې سرچینو رخشانې رسنۍ ته تایید کړې، چې دا پېښه د (وري په ۲۰ مه) نېټه، د دې ولسوالۍ په «ده تپه» کلي کې رامنځ ته شوې ده.
د سرچینو په وینا، دې ښځې شاوخوا ۲۵ کاله عمر درلود او د «کور په انګړ کې د رسۍ لوبې» په دلیل د خپل خاوند له خوا وژل شوې ده.
یوې سرچینې د هویت پټ ساتلو سره رخشانې رسنۍ ته ویلي، دا ښځه په ډېر بې رحمه ډول وژل شوې او بدن یې ټوټې ټوټې کړای شوی دی.
سرچینې زیاته کړې، د دې ښځې مېړه له پېښې وروسته له سیمې تېښته کړې ده.
تر اوسه هرات کې سیمه ییز طالب چارواکو په دې اړه نظر نه دی څرګند کړی. طالبان تر ډېره د ښځو او نجونو د ځانوژنې او وژل کېدو پېښې نه رسنیزې کوي.
دا پېښه په داسې حال کې رامنځ ته کېږي، چې په هېواد کې د ښځو په وړاندې د کورني تاوتریخوالي د دوام په اړه اندېښنې مطرح دي.
د روانې اوونۍ د یکشنبې په ورځ هم د جوزجان ولایت مرکز شبرغان ښار کې یوه ښځه «له بل سره سره د نامشروع اړیکې په تور» د مېړه له خوا وژل شوې وه.
د ۲۰۲۱ اګست کې د طالبانو تر بیا واک ته رسېدو وروسته، د ښځو او نجونو د ځانوژنې او وژل کېدو پېښې بې مخینې زیاتې شوې دي.
هر کال په هېواد کې لسګونه ښځې او نجونې د هغه څه په دلیل چې «ناموسي مسایل» ورته ويل کېږي، د خپلو خپلوانو او کورنیو د غړو له خوا وژل کېږي.
