د « افغانستان د ځوابوینې څارډلې AWA» سازمان ویلي، د افغان کډوالو د ایستلو په اړه د خبرو لپاره، له طالب چارواکو د اروپايي ټولنې کوربه توب د بشري په ځانګړې توګه د ښځو له حقونو منظمه سرغړونه ده.
رخشانه: دې سازمان په یوه بیانیه کې لیکلي، طالبان د نړیوالو حقونو په تړاو د افغانستان ژمنو ته درناوی نه کوي او له دې ډلې کوربه توب «له افغانستان سره د اروپايي ټولنې د تعامل له معیارونو سره په ټکر کې دي.»
یاد سازمان زیاته کړې، بروکسل کې له طالبانو سره تعامل به یوازې د دې ډلې په ګټه وي او د کورني مشروعیت، له پولو هاخوا خوځښتونو او په ټول کې د افغانانو په وړاندې د نورو محدودیتونو لګولو امکان به د هغوی لپاره لا پیاوړی کړي.
هغوی د افغان کډوالو د ایستلو په تړاو د خبرو لپاره د طالب چارواکو په کوربه توب اندېښنه څرګنده کړې وايي، «د تخنیکي ټیم په نوم باید د دې رژیم د عادي کولو لپاره د دیپلوماتیک پوښښ په توګه ونه کارول شي.»
اعلامیه کې راغلي، د طالبانو تر واک لاندې افغانستان ته د افغان کډوالو ستنول به، هغوی د بشري حقونو له جدي سرغړونو له هغې جملې، خپل سرو نیونو، ربړونې، مرګ او ورکېدو له ګواښ سره مخ کړي.
د افغانستان د ځوابوینې څارډلې ویلي چې «د افغان کډوالو د ایستلو لپاره د اروپايي هېوادونو د هڅو زیاتوالی، د کډوالو د نړیوال قانون، د اروپايي ټولنې د بنسټیزو حقونو د منشور او د بشري حقونو په اړه د اروپايي ټولنې کنوانسیون څخه، کوم چې هېوادونه په کلکه د هغو وګړو، چې له ګواښ سره مخ دي د ستنولو یا ایستلو څخه راګرځوي، سرغړونه ده.»
دې بنسټ له اروپايي ټولنې غوښتي، چې ژر تر ژره د افغان کډوالو د ایستلو په تړاو د طالب چارواکو رابلل لغوه کړي او څرګنده کړي، چې اروپايي ټولنه له نړیوالو بشري حقونو د سرغړونې په غندنه کې انتخابي عمل نه کوي.
دغه راز یاد بنسټ له اروپايي ټولنې غوښتي، چې پر طالبانو د اروپايي شورا او امنیت شورا لګول شوي بندیزونه وڅاري او له طالبانو سره د بې قید و شرط تعاملاتو څخه لاس په سر شي.
دې سازمانو د طالبانو تر واک لاندې افغانستان ته د کډوالو ستنولو درېدو غوښتنې کړې وايي، «د افغان کډوالو او پناه غوښتونکو لپاره قانوني او خوندي لارې له هغې جملې د بیا مېشتېدنې او بشر دوستانه وېزو د ورکړې لارې پیاوړې» شي.
د افغانستان د ځوابوینې څارډلې له اروپايي ټولنې غوښتي، چې د یوه دولت د رامنځ ته کولو لپاره د افغان وګړو له مبارزو ملاتړ وکړي او ډاډ تر لاسه کړي، چې د افغانستان اړوند د دوی ټول اقدامات او سیاسیتونه د نړیوالو بشري حقونو او د پناه غوښتونکو له حقونو سره همغږي پاتېږي.
په دې وروستیو کې د افغان کډوالو د ایستلو په تړاو له طالب چارواکو سره د خبرو لپاره د اروپايي ټولنې د کوربه توب په اړه راپورونه خپاره شوي، چې د بشري حقونو د بنسټونو اندېښنې یې راپارولې دي.
طالبانو تر اوسه په دې اړه غبرګون نه دی ښودلی. معلومه نه ده، چې ناسته به کله جوړه شي.
