د نجونو د زده کړې برخې یوه فعاله او د کابل لوېدیځ کې د سیدالشهدا د نجونو په ښوونځي له برید وتلې افغان نجلۍ ثریا محمدي د ۹۷ هېوادونو د ۱۵۰۰ زیاتو نوماندانو په منځ کې د «نړۍ بدلوونکو ښځو» جایزه وګټله.
رخشانه: د دې پروګرام وروستۍ پایلې د تېرې اوونۍ د چهارشنبې په ورځ (د اپرېل ۲۲مه) د فرانسې پاریس ښار کې د نړۍ بدلوونکو ښځو (Women Changing the World Awards) د نړیوالې ناستې په چوکاټ کې اعلان شوې.
په دې جایزه هغه ښځې ستایل کېږي، چې د جوړښتي ننګونو سره سره، د مشرۍ، نوښت، بشري حقونو او ټولینز اغېز له لارې ټولنو کې مانالرونکي بدلونونه رامنځ ته کوي.
د ۲۰۲۱ کال د اګست میاشت کې د کابل لوېدیځ ته د سیدالشهدا د نجونو ښوونځي له خونړي ځانمرګي برید روغه وتلې محمدي وايي، په دې برید کې د خپلو ملګرو له لاسه ورکولو د زده کړو او ټولنیز عدالت په اړه د هغې لیدلوری بدل کړی دی.
محمدي ویلي، د دې فعالیتونه تر ډېره د نجونو په زده کړې، سوادي زده کړو او د ښځو د حقونو په اړه د پوهاوي لوړولو باندې راڅرخي.
هغې مخکې د ځوانانو د نوښتونو لپاره د PACEY جایزه، «د نړۍ سولې لپاره د دعا نړیوالۍ اوونۍ» کې د افغان مسلمانانو د استازې په توګه د ګډون او د نجونو د زده کړې برخه کې د کار لپاره د Wilson Hinkes جایزې هم ګټلې وې.
د زده کړې د برخې دا فعاله په داسې حال کې دا جایزه تر لاسه کوي، چې له څلور کلونو زیات وخت راهیسې د طالبانو د محدودیتونو له آمله، له شپږم ټولګي بره نجونې ښوونځي ته له تګه بې برخې شوې دي.
همدارنګه دې ډلې هېواد کې د نجونو پر مخ د پوهنتونونو او نیمه لوړو طبي زده کړو موسسو دروازې هم بندې کړې دي.
