استرالیا کې د «ملي خبرو اترو ناستې» ګډنوالو د افغان ښځو په وړاندې له بشري حقونو د طالبانو د سرغړونو او محدودیتونو په اړه اندېښنه ښودلې ده.
رخشانه: دا ناسته پرون (یکشنبې د غوايي ۶ مه) د استرالیا ملبورن ښار کې د یو شمېر جلا وطنه افغان سیاسي او ټولینزو څېرو په ګډون جوړه شوې وه.
د ملي خبرو اترو د غونډې ګډنوالو د سیاسي انزوا، بېوزلۍ، بېکارۍ، له بشري حقونو د سرغړونې او د افغان ښځو په وړاندې د طالبانو له محدودیتونو اندېښنه وښوده.
دوی «د مشروع نظام او اساسي قانون نه شتون، قومي او سیمه ییز تعصوبونه، ټولنیزه بې باوري، له بشري حقونو سرغړونې او د افغان ښځو په وړاندې د طالبانو محدودیتونه، اقتصادي او د کډوالو بحرانونه» د افغانستان عمده ننګونې وبللې.
افغان سیاسي او ټولنیزو څېرو د هېواد اوسني وضعیت او د خلکو په وړاندې د طالبانو محدودیتونو ته په اشارې، د ملي خبرو اترو، ملي یووالي، سیاسي اجماع، د بشري حقونو مراعت کولو او افغانستان کې د یوه مشروع نظام په رامنځ ته کېدو ټيڼګار وکړ.
د دې ناستې ګډنوالو، د ملي خبرو اترو لپاره د یوه منظم چوکات جوړېدو، د سیاسي اجماع لپاره د لارې جوولو، د باور پیاوړتیا او کاري فرستونو د رامنځ ته کولو غوښتنه وکړه.
هغوی «د ستونزو د حل لپاره د تخصصي شبکو جوړولو، نړیوالو بنسټونو ته د افغان وګړو د غږ رسولو، د ښځو حقونو د خوندیتوب لپاره د هڅو او ملي خبرو اترو په پراختیا» هم ټيڼګار وکړ.
له دې غونډې مخکې، د ملي خبرو اترو ناستې، د یو شمېر جلا وطنه افغان سیاسي او ټولنیزو څېرو په ګډون، په لندن، برلین، سکرمنتو، کولن، برمینګهام، هامبورک، تورنټو، والسال او فرانکفورت کې جوړې شوې وې.
