د فوټبال نړیوال فدراسیون (فیفا) اعلان کړی، چې جلا وطنه افغان ښځینه فوټبال لوبډله، د طالبانو د تایید له اړتیا پرته، کولي شي، په رسمي سیالیو کې د افغانستان استازولي وکړي.
رخشانه: فیفا نن (چهارشنبې د غوايي ۹ مه) په یوه اعلامیه کې لیکلي، دا پرېکړه فوټبالرو ښځو ته لار هواروي، تر څو د آسیا فوټبال فدراسیون (AFC) سره په همغږۍ د فیفا په لوبو کې د خپل هېواد استازیتوب وکړي.
د فوټبال نړیوال فدراسیون ویلي، د (Afghan Women United)فوټبال ټیم، چې د جلا وطنه افغان ښځینه لوبغاړو له خوا جوړ شوی، ملاتړي ملاتړ کوي.
د فوټبال د نړیوال فدراسیون مشر جیاني اینفانتینو وايي، «دا پرېکړه د نړۍ په لوبو کې یو پیاوړی او بې مخینې ګام دی.»
د فیفا مشر زیاته کړې، چې د دې لوبغاړو خبرې یې اورېدلې او د خپل مسوولیت په چوکاټ کې یې د فوټبال د لوبې او خپل هویت له استازیتوب څخه د عمل لپاره د هر نجلۍ او ښځې د حق ساتنه کړی ده.
د افغان ښځینه فوټبال ملي لوبډلې پخوانۍ غړې نادیه ندیم وايي، «دا پرېکړه افغان ښځینه لوبغاړې د شرایطو د قربانیانو په توګه نه، بلکې د مسلکي لوبغاړو په توګه پېژني، چې د سیالۍ کولو، لیدل کېدو او درناوي حق لري.»
ټاکل شوې د Afghan women united لوبډلې راتلونکی رونیز کمپ د روان کال د جون میاشتې له لومړنۍ نېټې تر نهمې پورې په نیوزیلنډ کې تر سره شي.
دې لوبډلې څو میاشتې وړاندې د «فیفا د ښځو یووالۍ راولي» لوبلړۍ په څلور اړخیزه سیالیو کې د افغانستان په استازیتوب، د چاد، تونس او لیبیا ښځینه فوټبال لوبډلو سره سیالۍ وکړې.
دا د طالبانو له واکمنېدو وروسته، لومړی ځل دی، چې د افغان فوټبال ښځینه ملي لوبډله په نړیوالو سیالیو کې برخه اخلي.
طالبانو واک ته له بیا راتګ وروسته، د ښځو او نجونو په وړاندې د نورو محدودیتونو تر څنګ، د ښځو لوبې هم بندې کړې.
د دې محدودیت له لګولو وروسته، د افغانستان د ښځینه فوټبال ملي لوبډلې غړو هېواد پرېښود او په استرالیا، برېتانیا، آلبانیا، پرتګال او امریکا کې یې پناه واخیسته.
