د بې پولو خبریالانو سازمان (RSF) د ۲۰۲۶ کال د نړۍ د مطبوعاتو آزادۍ په شاخص کې ویلي، د طالبانو تر واک لاندې افغانستان د نړۍ د مطبوعاتو آزادۍ په شاخص کې ۵۳ پوړه راټیټ شوی دی.
رخشانه: دې سازمان نن (پنشنبې د غوايي ۱۰ مه) د مطبوعاتو آزادۍ د نړیوالۍ ورخې په نېږدې کېدو، په ۲۰۲۶ کال کې د نړۍ د مطبوعاتو آزادۍ د شاخص راپور خپرو کړی دی.
د بې پولې خبریالانو راپور کې راغلي، د طالبانو تر واک لاندې افغانستان د ۱۸۰ هېواد تر منځ په ۱۷۵ رده کې ځای لري او په تېرو نېږدې پنځو کلونو کې یې د مطبوعاتو آزادۍ د شاخص له پلوه ۵۳ پوړه ټیټوالی کړی دی.
راپور کې راوړل شوي، د ۲۰۲۱ اګست کې د طالبانو بیا واک ته رسېدو سره، دې ډلې په رسنیو فعالیتونو ډېر محدودیتونه لګولي او خپلواکه رسنۍ یې ځپلې دي.
افغانستان په ۲۰۲۱ میلادي او د طالبانو تر واک مخکې د نړۍ د مطبوعاتو آزادۍ په شاخص کې ۱۲۲ ځای درلود. د طالبانو په راتګ سره یې ۳۴ پوړه ټیټوالی کړی او په ۱۵۶ رده کې شو.
د مطبوعاتو د آزادۍ د شاخص د راپور له مخې، افغانستان په ۲۰۲۳ میلادي کال کې د ۱۸۰ هېوادونو له ډلې څخه ۱۵۲ ام، په ۲۰۲۴ کې ۱۷۸ ام او تېر کال ۱۷۵ ام ځای درلود.
ناروې هېواد د ۲۰۲۶ کال د مطبوعاتو آزادۍ د نړیوالې درجه بندۍ په سر کې دی، افغانستان او ایران په ترتیب سره په ۱۷۵ او ۱۷۷ ام ځای کې دي او اریتریا د درجه بندۍ په پای کې دی.
د بې پولې خبریالانو سازمان ویلي، د نړۍ د مطبوعاتو آزادۍ د شاخص په تاریخ کې د لومړي ځل لپاره د نړۍ له نیمايي ډېر هېوادونه اوس د مطبوعاتو آزادۍ د کچې له مخې په «سخت» یا «ډېر جدي» کټګورۍ کې دي.
طالبانو د خپلې واکمنۍ په نېږدې پنځو کلونو کې پر رسنیو او رسنیزو فعالیتونو سخت محدودیتونه لګولي دي.
دا ډله د محدودیتونو په لګولو سره د لسګونه غږیزو، تصویري او چاپي رسنیو د فعالیت بندېدو سبب شوي او څو خبریالان، کارکوونکي او رسنیز فعالان یې نیولي او زنداني کړي دي.
د بې پولې خبریالانو سازمان ویلي، دا مهال افغانستان کې څلور خبریالان او رسنیز کارکوونکي د طالبانو په بند کې دي.
