د بشري حقونو فعالې او د نوبل جایزې ځوانې ګټونکې ملالې یوسفزۍ د سکاټلېنډ له لومړي وزیر جان سوین سره لیدنه کې، د افغان ښځو او نجونو په وړاندې د جنستیي توپير «په نړیوالو حقونو کې د جرم» په توګه د په رسمیت پېژندلو غوښتنه وکړه.
رخشانه: ملالې بنسټ نن (پنشنبې د غوايي ۱۰ مه) په یوه اعلامیه کې لیکلي، یوسفزۍ او سوین په «ادینبرو» کې سره ولیدل او د طالبانو له لوري د افغان ښځو او نجونو «منظم محرومیت» او د «جنسیتي توپیر په رسمیت پېژندولو لپاره د مخ په زیاتېدونکي نړیوال کمپاین» په اړه یې خبرې اترې وکړې.
اعلامیه کې راوړل شوي، هغوی په دې خبرو اترو کې «د افغان ښځو د مشرتابه رول او د حساب ورکولو د ډاډمن کولو لپاره د همغږۍ قانوني، سیاسي او نړیوال اقدام په اړتیا» باندې ټينګار وکړ.
ملالې له افغان نجونو د سکاټلېنډ د ملاتړ هرکلی وکړ ویلي یې دي «کله چې نړۍ ومني، چې د ښځو د حقونو منظم محرومول یو جرم دی، کولی شي طالبان او ملاتړ یې ځواب ویوونکي» کړي.
د بشري حقونو دې فعالې تمه ښودلې، چې د نورو هېوادونو مشران او رهبران به هم «د سکاټلېنډ له لومړي وزیره پیروي وکړي او جنستي توپیر به د بشریت په وړاندې د جرم په توګه په رسمیت وپېژني»
د سکاټلېنډ لومړي وزیر جان سوین هم ویلي، چې په نړیوالو حقونو کې د جرم په توګه د جنسیتي توپیر د په رسمیت پېژندلو له نړیوال کمپاین څخه ملاتړ کوي.
هغه زیاته کړې: «څرګنده ده، چې طالبان د افغان ښځو او نجونو په وړاندې د منظمې ځپنې یو بنسټیز سیستم پلی کوي. دا مسله بېړني اقدام ته اړتیا لري. هېڅ یوه ټولنه چې د ښځو او نجونو حقونه ترې اخلي، نه باید د دوام اجازه ورکړل شي.»
د سکاټلېنډ لومړي وزیر «افغانستان کې د نجونو د زده کړې د حق ملاتړ او د هغوی د غږونو د پیاوړتیا په پار د عملي ملاتړ لپاره د نړیوالې ټولنې د یووالي په اړتیا» ټینګار کړی دی.
هغه ژمنه وکړه چې «سکاټلېنډ به د بشري حقونو د سرغړونو په وړاندې د درېدو او د نړۍ له ګوټ ګوټ نه د ظلم څخه د تښتېدونکو خلکو په هرکلي سره خپل رول لوبولو ته دوام ورکړي.»
سکاټلېنډ په ۲۰۲۱ میلادي کال کې له افغان نجونو د ملاتړ په پار د طب څانګې ۱۹ نجونې ولېږدولې او هغوی ته یې د هېواد په پوهنتونونو کې د خپلو زده کړو د دوام فرصتونه برابر کړل.
