ملګرو ملتونو اعلان کړی، چې افغانستان کې د نړۍ یو له خوا سختو او پېچلو محافظتي بحرانونو رامنځ ته کېدونکی دی او دې وضعیت په هېواد کې بشردوستانه اړتیاوې زیاتې کړې دي.
رخشانه: ملګرو ملتونو نن (پنشنبې د غوايي ۱۰ مه) د یوه راپور په خپرولو سره لیکلي «د دې بحران په زړه کې د جنسیت پر بنسټ محدودیتونو یو سیستم دی، چې زده کړې، کارموندنې، عامه ګډون او اساسي خدماتو ته د ښځو او نجونو لاسرسی په جدي توګه محدودوي.»
ملګرو ملتونو د طالبانو له لوري د ښځو او نجونو د حقونو او خپلواکیو په وړاندې پراخو محدودیتونو ته په اشارې وايي، دې محدودیتونو د نیمايي وګړو وړتیاوې کمزورې کړې او د بشردوستانه مرستو د وړاندې کولو لپاره یې د مرستندویه بنسټونو توان د پام وړ کم کړی دی.
دې بنسټ زیاته کړې، د نجونو لپاره د منځنیو او لوړو زده کړو بندیز، په مهمو سکتورونو کې د ښځو په کار کولو بندیز او د ښځینه بشري کارمندانو په اړه دوامداره محدودیتونه ټول د خوندیتوب د خطرونو له زیاتوالي سره مرسته کړې ده.
د ملګرو ملتونو راپور کې راغلي، هممهاله افغانستان د راستنېدونکو کډوالو یوې لویې څپې سره مخ دی. په تېرو دوه کلونو کې شاوخوا ۵ میلیونه کډوال له ګاونډیو هېوادونو راستانه شوي، چې د نفوس د نېږدې لس سلنې زیاتوالي سره برابر دی.
راپور کې راوړل شوي، ډېری دا خلک د فشار لاندې، پرته له اسنادو، شتمنیو یا ملاتړو شبکو څخه هېواد ته راغلي، چې په هغو خدماتو فشار یې زیات کړی، چې د مخه یې کارمندان وو.
ملګرو ملتونو ویلي، افغانستان د اقلیمي ناورینونو له څپې سره مخ دی، وچکالي، د ځمکې لاندې اوبو کمېدونکې سرچینې، سېلابونهو ځمک ښویدنې او پرله پسې زلزلې کورونه او حیاتي زېربناوې ویجاوړي.
د دې بنسټ په وینا، افغانستان کې له ۷۰ سلنه زیاتې کورنۍ کافي خواړه نه لري. دا وضعیت د پانګو د پاشل کېدو، کم عمره ودونونو او روغتیايي او زده کړیزو خدماتو ته د لاسرسي د کمېدو سبب شوي.
ملګري ملتونه وايي، هیله لري نړیواله ټولنه به په افغانستان کې د اړمنو خلکو ملاتړ ته دوام ورکړي، ځکه چې په هېواد کې د میلیونونو خلکو لپاره بشري مرستو ته سخته اړتیا ده.
