د ښځو د حقونو فعاله او ولسي جرګې پخوانۍ غړې فوزیه کوفي ادعا کوي، چې طالبانو د دې درې تنه خپلوان نیولي او درې میاشتې وړاندې یې د دې په کور په یرغل سره هغه غصب کړی دی.
رخشانه: مېرمن کوفي نن (سه شنبې د غوايي ۱۲ مه) په خپله اېکس پاڼه لیکلي، طالبانو په خپلې غیر مشروع واکمنۍ سره د خلکو ژوند ورځ تر بلې سخت کړی دی.
نوموړې ادعا کړې، چې طالبانو درې میاشتې وړاندې د دې په شخصي کور یرغل کړی، هغه یې غصب کړی او د کورنۍ او خپلوانو څو تنه غړي یې د سیمې پرېښودو ته اړ شوي دي.
کوفي همدارنګه زیاته کړې، چې د تېرې اوونۍ د سه شنبې په ورځ یې د خپلوانو استوګنځای هم د طالبانو تر برید لاندې راغلی او یو شمېر خپلوان «ان بدخشاني وطنوال، چې له ما سره هېڅ ډول کورنۍ تړاو نه لري.» نیول شوي دي.
نوموړې د هغوی له برخلیکه بې خبري ښودلې لیکي «له هغه وخته تر اوسه د دې کسانو کورنۍ د هغوی له برخلیک، روغتیايي وضعیت او شرایطو معلومات نه لري، له هغوی د دو تنو روغتیايي ستونزې هم درلودې.»
د هېواد د ولسي جرګې دې پخوانۍ غړې همدارنګه لیکلي، د طالبانو له لوري دا ډول کړنې بې غیرتي ده او ښيي چې دا ډله له یوې خوا د پاشل کېدو په حال کې ده او له بل لوري، د افغان ښځو مبارزې اغېزمنې او ټاکل کوونکې دي.
مېرمن کوفي د دې طالبانو دې اقدام ته په اشارې ویلي، د خپلو خلکو د آزدۍ حق تر لاسه کولو، د عزت د اعادې او انساني کرامت لپاره به خپلې مبارزې ته دوام ورکړي.
هغې له مسوولو بنسټونو غوښتي، چې د نیول شویو کسانو د وضعیت څېړلو په موخه ګام پورته کړي او د هغوی کورنیو ته د دوی له روغتیا او خوندیتوبه ډاډه کړي.
مېرمن کوفي دا نه دي ویلي، چې کور یې کابل کې او که بدخشان کې د طالبانو له لوري غصب شوی دی.
تر اوسه طالب چارواکو هم په دې اړه غبرګون نه دی ښودلی.
طالبانو په تېرو څه کم پنځو کلونو کې په وار وار د سیاسي څېرو او خپلو مخالفینو ملکیتونه غصب کړي دي.
