هلمند کې سیمه ییز طالب چارواکي وايي، د دې ولایت ناوې ولسوالۍ کې د شپږو ښځو او دو ماشومانو په ګډون اته تنه اوبو ډوب کړي او ژوند یې باللی دی.
رخشانه: هلمند کې د طالبانو د اطلاعاتو او کلتور رییس حافظ عبدالباري راشد وايي، دا اته تنه پرون (جمعه د غوايي ۱۱ مه) په دوه جلا پېښو کې د هلمند ناوې ولسوالۍ کې اوبو ډوب کړي او ژوند یې له لاسه ورکړی دی.
راشد ویلي، لومړی پېښه هغه مهال رامنځ ته شوې، چې یوه کورنۍ د سفر پر مهال د سیند په غاړه درېدلې وه.
د هغه په وینا، په پیل کې یوه عمر خوړلې مېرمن د سیند په اوبو کې ډوبه شوې او د هغې د ژغورلو په هڅه کې شپږ نورې ښځې هم اوبو ته ورګډې شوې دي.
هلمند کې د طالبانو د اطلاعاتو او کلتور رییس زیاته کړې، سیند ته د هغوی له ټوپ وهلو وروسته، دوه ښځو ژوند له لاسه ورکړی، دوه تنې ژغورل شوې او دوه نورې لا هم نه دي پیدا شوې.
بله پېښه کې د ناوې ولسوالۍ د «سرخ دوز» په سیمه کې یوه ماشومه نجلۍ او یو هلک په اوبو کې ډوب شوي دي.
تر اوسه د دې دوه ماشومانو جسدونه نه دي موندل شوي.
ورته پېښې هر کال د پسرلي په موسم کې د سیندونو د اوبو کچې راپورته کېدو له امله د هېواد په یو شمېر ولایتونو کې رامنځ ته کېږي.
