د افغانستان لپاره د برېتانیا ځانګړي استازي ریچارد لیندسي ویلي، سره له دې، چې شرایط سخت دي، خو افغان خبریالان لا هم خپل حیاتي کار ته دوام ورکوي او د افغانستان د خلکو غږ پورته کوي.
رخشانه: لیندسي نن (یکشنبې د غوايي ۱۳ مه) د مطبوعاتو نړیوالې ورځې سره سم په خپله اېکس پاڼه لیکلي، چې تېره اوونۍ یې کابل کې له یو شمېر افغان خبریالانو سره ولیدل.
هغه لیکلي: «تېره اوونۍ مې له یو شمېر افغان خبریالانو سره وکتل، هغو سره له دې، چې شرایط سخت دی، خو خپلو حیاتي کارونو ته دوام ورکوي، د افغانستان د خلکو اندېښنې او غوښتنې روښانه کوي.»
د افغانستان لپاره د برېتانیا ځانګړي استازي د بیان آزادۍ پر اهمیت ټینګار کړی وايي، خبریالان «هغه کسانو ته چې تر ټولو زیات غږ پورته کولو ته اړتیا لري، غږ ورکوي.»
د افغان خبریالانو مرکز پرون په یوه راپور کې لیکلي، په تېر یوه کال کې په هېواد کې د رسنیو ځپل او سانسور په بې سارې اندېښمنونکې توګه زیاتوالی کړی دی.
د راپور له مخې، په دې موده کې یې د طالبانو له لوري د رسنیو او خبریالانو له آزادۍ د سرغړونې لږ تر لږه ۱۵۰ پېښې ثبت کړې، چې ۱۲۷ پېښې د ګواښلو او ۲۰ پښې یې د خبریالانو د نیولو دي.
په تېر یوه کال کې هېواد کې پر ښځینه خبریالانو محدودیتونه زیات شوي، په څو ولایتونو کې په رسمي ډول د ښځو په غږ بندیز لګول شوی او څو ځلې د طالبانو په خبري ناستو کې د ښځینه خبریالانو غږ سانسور کړای شوی دی.
همدارنګه په دې موده کې ۲۰ خبریالان او د رسنیو کارکوونکي د طالبانو له لوري نیول شوي او بندي شوي دي. څلور خبریالان لا هم د طالبانو په بند کې دي.
د بې پولې خبریالانو سازمان هم په خپل کلني راپور کې لیکي، افغانستان د نړۍ د ۱۸۰ هېوادونو تر منځ د مطبوعاتو آزادۍ په درجه بندۍ کې ۱۷۵ ام ځای لري.
د دې سازمان د راپور له مخې، افغانستان د خبریالانو، په ځانګړې توګه د ښځینه خبریالانو لپاره یو له تر ټولو خطرناکو هېوادونو څخه دی.
