د افغانستان د بشري حقونو لپاره د ملګرو ملتونو ځانګړي راپور ورکوونکي ریچارد بنټ ویلي، لږ تر لږه څلور خبریالان او د رسنیو کارکوونکي لا هم په افغانستان کې د طالبانو په بند کې دي
رخشانه: بنټ نن (یکشنبې د غوايي ۱۳ مه) د مۍ درېیمه د مطبوعاتو د آزادۍ نړیوالې ورځې سره سم، په خپله اېکس پاڼه یو ځل بیا د خبریالانو او هغه کسانو چې «په خپل سرې توګه» افغانستان کې د طالبانو له خوا نیول شوي د غوښتي کېدو غوښتنه وکړه.
هغه لیکلي: «د دې کار لپاره تر نن ورځې بل ښه وخت نشته، په ځانګړې توګه د مۍ ۳ مه چې د مطبوعاتو د آزادۍ نړیواله ورځ ده.»
بنټ د جمعې په ورځ هم د مطبوعاتو د آزادۍ نړیوالې ورځې د رارسېدو په تړاو په یوه اعلامیه کې د طالبانو له زندان نه د خبریالانو د خوشي کولو غوښتنه کړې وه.
هغه ویلي وو، د طالبانو تر واک لاندې افغانستان کې د ښځینه خبریالانو لپاره رسنیز کار خورا سخت دی، ځکه هغوی د تګ راتګ د آزادۍ له محدودیتونو او همدارنګه د جبري حجاب د شرایطو له امله له ژور تبعیضي خنډونو سره مخ کېږي.
د افغان خبریالانو مرکز د راپور له مخې، په تېر یوه کال کې په هېواد کې د رسنیو ځپل او سانسور په بې سارې اندېښمنونکې توګه زیاتوالی کړی دی.
دې مرکز ویلي، په دې موده کې یې د طالبانو له لوري د رسنیو او خبریالانو له آزادۍ د سرغړونې لږ تر لږه ۱۵۰ پېښې ثبت کړې، چې ۱۲۷ پېښې د ګواښلو او ۲۰ پښې یې د خبریالانو د نیولو دي.
په تېر یوه کال کې، هېواد کې پر ښځینه خبریالانو محدودیتونه زیات شوي، په څو ولایتونو کې په رسمي ډول د ښځو په غږ بندیز لګول شوی او څو ځلې د طالبانو په خبري ناستو کې د ښځینه خبریالانو غږ سانسور کړای شوی دی.
همدارنګه په دې موده کې ۲۰ خبریالان او د رسنیو کارکوونکي د طالبانو له لوري نیول شوي او بندي شوي دي. څلور خبریالان لا هم د طالبانو په بند کې دي.
د بې پولې خبریالانو سازمان هم په خپل کلني راپور کې لیکي، افغانستان د نړۍ د ۱۸۰ هېوادونو تر منځ د مطبوعاتو آزادۍ په درجه بندۍ کې ۱۷۵ ام ځای لري.
د دې سازمان د راپور له مخې، افغانستان د خبریالانو، په ځانګړې توګه د ښځینه خبریالانو لپاره یو له تر ټولو خطرناکو هېوادونو څخه دی.
