د ملګرو ملتونو، عملي، ښوونیز او کلتوري سازمان اعلان کړی، چې له ۲۰۱۲ راهیسې په ټوله نړۍ کې د خبریالانو تر منځ د ځان سانسورولو کچه ۶۳ سلنه زیاته شوې ده.
رخشانه: دې بنسټ نن (یکشنبې د غوايي ۱۳مه) د مۍ درېیمه د مطبوعاتو آزادۍ د نړیوالې ورځې په تړاو یوه اعلامیه کې لیکلي، خبریالان د فساد، بشري حقونه او چاپېریالي موضوعاتو په څېر مسلو له پوښښ څخه ډډه کوي.
د یونسکو په اعلامیه کې راغلي، آزدۍ په ټولنو کې د سولې یو له ستنو ده، خو نن ورځ دغه ستنه تر فشار لاندې ده.
د یونسکو سازمان په وینا، د نړۍ په کچه له ۲۰۱۲ کال راهیسې د بیان آزادي ۱۰ سلنه کمه شوې او د خبریالانو تر منځ د ځان سانسورولو کچه ۶۳ سلنه لوړه شوې ده.
یونسکو ویلي، د خبریالانو په وړاندې د جرمونو سزا ورکولو څخه خوندیتوب ۸۵ سلنه پر ځای پاتې دی.
دې بنسټ ټينګار کړي، چې آزاد معلومات ځوبوینه او بشري حقونه پیاوړي کوي او د «سوله ییزه او عادلانه ټولنو جوړولو لپاره د باور وړ او تاييد شويو معلوماتو ته لاسرسی اړین دی.»
د ملګرو ملتونو دې سازمان ویلي «کله چې په معلوماتو کې لاسوهنه کېږي، کرکې ته لمن وهي او باور کمزوری کوي.»
یونسکو د مطبوعاتو آزادۍ په نړیوالو ورځ، د بیان له آزادۍ د ساتنې او د سولې د ستنو په توګه د خبریالۍ د ملاتړ غوښتنه کړې ده.
د ملګرو ملتونو د ښځو څانګې دوه ورځې وړاندې په یوه راپور کې لیکلي وو، کابو نیمايي ښځینه خبریالانې په ټولینزو شبکو د آنلاین تاوتریخوالي له امله ځان سانسوروي او ۲۲ سلنه هم په خپل مسلک کې په ځان سانسورولو لاس پورې کوي.
دې بنسټ زیاته کړې، د ښځینه ځواب ورکوونکو ۴۱ سلنه ویلي، دوی په ټولنیزو رسنیو کې د ځورونې څخه د مخینوي لپاره ځان سانسوروي او ۱۹ سلنه د آنلاین تاوتریخوالي له امله په خپل مسلکي کار کې ځان سانسوروي. دا وضعیت د ښځینه خبریالانو او رسنیو د کارکوونکو لباره نوره هم د اندېښنې وړ ده.
د ملګروملتونو راپور راوړي، په ۲۰۲۵ کال کې ۴۵ سلنه ښځینه خبریالانو او د رسنیو کارکوونکو په ټولنیزو رسنیو کې د ځان سانسور راپور ورکړی او نېږدې ۲۲ سلنه ویلي، دوی په کار کې په ځان سانسور کې ښکېل دي.
