د «افغان ښځو د سیاسي ګډون شبکې» ویلي، په هېواد کې د طالبانو له لوري د رسنیو د ځپلو او بیان له آزادۍ د سرغړونو دوام، د خلکو غږونه غلي کوي او په ټولنه کې د عدالت پلټنې مخه نیسي.
رخشانه: د دې اعتراضي غورځنګ غړو نن (یکشنبې د غوايي ۱۳ مه) د مطبوعاتو نړیوالۍ ورځې په تړاو یوه اعلامیه کې د [طالبانو تر واک لاندې] افغانستان کې د «د بیان آزادۍ خرابېدونکي وضعیت، د رسنیو ځپلو او د بشري حقونو څخه د پراخو سرغړونو په اړه اندېښنه څرګنده کړې ده.
په اعلامیه کې راوړل شوي، د افغانستان په اوسنیو شرایطو کې، خبریالان، مدني فعالان، ښوونکي او د رسنیو کارکوونکي له منظم سانسور، ګواښ، نیونې او پراخو فشارونو سره مخ دي.
دغه بنسټ زیاته کړې، د طالبانو تر واک لاندې افغانستان کې خپلواکه رسنۍ له سختو محدودیتونو سره مخ دي او معلوماتو ته د خلکو آزاد لاسرسی په جدي توګه کمزوری شوی دی.
معترضې ښځې وايي، د بیان آزادي او معلوماتو ته لاسرسی د یوې عادلانه او دموکراتیکې ټولنې له اساسي اصولو څخه دي.
د «افغان ښځو د سیاسي ګډون شبکې» له نړیوالې ټولنې، د بشري حقونو له بنسټونو او خپلواکه رسنیو غوښتي، چې له ګواښ سره مخ خبریالانو او فعالانو عملي ملاتړ وکړي.
همدارنګه دوی هېواد کې د بشري حقونو د سرغړونو مستند کولو غوښتنه کړې وايي، «د افغانستان د خلکو په ځانګړې توګه د اساسي حقونو او بیان آزادۍ بېرته راژوندي کولو لپاره باید ګټور او بېړني ګامونه» تر سره شي.
د افغان خبریالانو مرکز د راپور له مخې، په تېر یوه کال کې په هېواد کې د رسنیو ځپل او سانسور په بې سارې اندېښمنونکې توګه زیاتوالی کړی دی.
دې مرکز ویلي، په دې موده کې یې د طالبانو له لوري د رسنیو او خبریالانو له آزادۍ د سرغړونې لږ تر لږه ۱۵۰ پېښې ثبت کړې، چې ۱۲۷ پېښې د ګواښلو او ۲۰ پښې یې د خبریالانو د نیولو دي.
دغه مرکز لیکلي، په تېرو دولسو میاشتو کې، هېواد کې پر ښځینه خبریالانو محدودیتونه زیات شوي، په څو ولایتونو کې په رسمي ډول د ښځو په غږ بندیز لګول شوی او څو ځلې د طالبانو په خبري ناستو کې د ښځینه خبریالانو غږ سانسور کړای شوی دی.
په دې موده کې ۲۰ خبریالان او د رسنیو کارکوونکي د طالبانو له لوري نیول شوي او بندي شوي دي. څلور خبریالان لا هم د طالبانو په بند کې دي.
