د «انجینر همایون خواهاني» په نوم د یوه کس مېرمن ادعا کړې، چې طالبانو یې خاوند، د بشري حقونو د فعالې او ولسي جرګې د پخوانۍ غړې فوزیې کوفي سره د کورني تړاو له امله نیولی دی.
رخشانه: د دې سړي مېرمن سیاموی خواهاني ویلي، چې خاوند یې اووه ورځې وړاندې کابل ښار کې طالبانو نیولی دی.
مېرمن خواهاني وايي، خاوند یې یوازې له فوزیې کوفي سره د کورني تړاو په دلیل نیول شوی دی.
نوموړې زیاته کړې، تر اوسه هغې د ځای، روغتیايي وضعیت او برخلیک په اړه معلومات نه دي تر لاسه کړي.
دې مېرمنې ویلي، خاوند یې بې ګناه دی او «پنځه میاشتې کېږي، چې د (طالبانو) له کومت سره کار او خپل هېواد ته خدمت کوي.»
مېرمن خواهاني، د طالبانو له لوري د خپل خاوند نیول کېدل، د انساني، اسلامي او حقوقي اصولو خلاف کار بللی او د هغه د ژر تر ژره او له قید و شرط پرته خوشي کېدو غوښتنه یې کړې ده.
فوزیې کوفي هم دوه ورځې وړاندې اعلان وکړ، چې طالبانو د دې څلور تنه خپلوان او «ان بدخشاني وطنوال یې» چې له دې سره هېڅ ډول تړاو نه لري نیولي او په کابل کې یې د دې د استوګنې کور غصب کړی دی.
طالب چارواکو تر اوسه په دې تړاو څه نه دي ویلي.
طالبانو په تېرو نېږدې پنځو کلونو کې په وار وار د یو شمېر سیاسي څېرو او مخالفینو شخصي ملکیتونه او جایدادونه غصب کړي دي.
