ننګرهار کې سیمه ییزه سرچینې وايي، د دې ولایت مرکز جلال آباد ښار کې د «نارنج ګل» په کلنۍ مشاعره کې، په دې پروګرام کې ګډونوالو خبریالانو ته «سپکاوی» وکړ او هغوی یې «جاسوسان» وبلل.
رخشانه: دا پروګرام پرون (دوشنبې د غوايي ۱۴ مه) د ننګرهار مرکز جلال آباد ښار په «سراج العمارت) بڼ کې د یو شمېر شاعرانو او ننګرهار د سیمه ییزې ادارې طالب چارواکو په ګډون تر سره شوه.
دوه تنه خبریالان چې نارنج ګل مشاعرې ته د خبري پوښښ لپاره ورغلي وو وايي، د پروګرام یو چلوونکی چې د طالبانو غړی وو، خبریالانو ته سپکاوی وکړ او له هغوی سره یې په ستوغه لحجه خبرې وکړې.
یو له خبریالانو د هویت پټ ساتلو سره رخشانې رسنۍ ته ویلي، د پروګرام چلوونکی (انانسر) چې د طالبانو غړی وو، خبریالانو ته د میګروفون اېښودو اجازه ورنه کړه.
د دې سرچینې په وینا، د طالبانو دغه غړی، چې له کابله جلال آباد ته ورغلی وو، له تونده لحجه خبریالانو ته ویلي دي «تاسو خبریالان له سره د سړي زامن نه یاستی.»
د طالبانو د دې غړي له چلند وروسته، ټولو خبریالانو د دې سپکاوي په اعتراض کې پروګرام ځای پرېښود او لاړل.
په دې پروګرام کې یوې حاضرې سرچینې ویلي، د طالبانو یوه غړي د خبریالانو له خوا د پروګرام پرېښودو په غبرګون کې ویلي: «خبریالان ټول جاسوسان دي.»
سرچینې د دې طالب غړو د نومونو او کاري ځای په اړه معلومات نه درلودل.
رخشانې رسنۍ ته رسېدلې ویډیو کې، له دې پروګرامه د خبریالانو د وتلو شېبه هم ښودل کېږي.
جلال آباد کې خبریالانو، په نارنج ګل مشاعره کې له خبریالانو سره د طالبانو د دې غړو چلند غندلی او هغه یې سپکوونکې بللې دي.
په دې ولایت کې خبریالان وايي، طالب چارواکي د بیان پر آزادۍ هېڅ باور نه لري او هغه څه چې په خوله وايي، په عمل کې یې نه دي ثابت کړي.
تر اوسه ننګرهار کې د طالبانو د سیمه ییزې ادارې چارواکو په دې اړه څه نه دي ویلي.
نارنج ګل مشاعره یو کلتوري پروګرام دی، چې هر کال د هېواد د ختیځو ولایتونو د شاعرانو او فرهنګیانو په شتون کې، د جلال آباد ښار په کوربه توب په ننګرهار ولایت کې ترسره کېږي.
طالبانو په تېرو نېږدې پنځو کلونو کې، په هېواد کې د رسنیو په کار سخت محدودیتونه لګولي دي. دې ډلې په دغه موده کې په وار وار خبریالان، رسنیز کارکوونکي او فعالان نیولي، ربړولي او زنداني کړي یې دي.
د افغان خبریالانو مرکز دوه ورځې وړاندې په یوه راپور کې اعلان کړی وو، چې په تېر یوه کال یې د رسنیو له آزادۍ او د خبریالانو له حقونو د سرغړونې ۱۵۰ پېښې ثبت کړې دي.
د دې مرکز د راپور له مخې، څلور خبریالان لا هم د طالبانو په زندان کې شپې ورځې تېروي.
