افغانستان کې د ملګرو ملتونو د وګړو صندوق (UNFPA) ویلي، قابلې د امیدوارۍ پر مهال د پاملرنې، خوندي زېږون او له زېږون وروسته خدماتو ته لاسرسی پراخوي.
رخشانه: دې بنسټ نن (سه شنبې د غوايي ۱۵ مه) د قابلو نړیوالې ورځې په مناسبت په یوه اعلامیه کې لیکلي، «قابلې ټولنې ته د مهارت، زړورتیا او امید په راوړلو سره، د انسانانو ژوند ژغوري.»
د ملګرو ملتونو د وګړو صندوق په اعلامیه کې راغلي، د قابلو د روزنې لپاره پانګونه، د میندو او ماشومانو د ژوند ژغورلو تر ټولو ګټوره لار ده.
دې سازمان زیاته کړې، په افغانستان کې له یو میلیون څخه په زیاتو قابلو د پانګونې اړتیا ده.
د طالبانو تر واک لاندې افغانستان د روغتیايي ښځینه پرسونل له کمښت سره مخ دی. ملګرو ملتونو څه موده وړاندې په یوه راپور کې لیکلي وو، د افغان نجونو په زده کړه او د ښځو پر کار د طالبانو محدودیتونه، کولی شي تر ۲۰۳۰ میلادي کال پورې دا هېواد له ۲۵ میلیونه زیاتو ښځینه ښوونکو او روغتیايي کارکوونکو له کمښت سره مخ کړي.
ملګرو ملتونو لیکلي «د روغتیا برخه کې د ښځینه روغتیايي کارکوونکو کمښت، په مستقیم ډول روغتیايي خدماتو ته د میندو، نوزېږدو او ماشومانو لاسرسی کموي او ښځې او ماشومان له لا زیات ګواښ سره مخ کوي.»
طالبانو د ښځینه روغتیايي کارکوونکو پر فعالیت د محدودیتونو تر څنګ، هېواد کې د نجونو پر مخ د طبي انستېتیوتونو دروازې هم تړلي دي.
ملګرو ملتونو په وار وار ویلي، پر زده کړو او ښخینه روغتیايي کارکوونکو د طالبانو محدودیتونو، د افغانستان روغتیايي نظام کمزوری کړی دی.
طالبان د ۲۰۲۱ په اګست کې له بیا ځلي واکمنېدو وروسته، ناروغانو ته د روغتیايي خدماتو وړاندې کولو په کړنلاره او ښځینه روغتیايي کارکوونکو پر فعالیت بندیزونه لګولي دي.
په اوس وخت کې ښځینه روغتیايي کارکوونکې باید له شرعي محرم سره یو ځای روغتیايي مرکزونو ته ولاړې شي او نارینه ډاکتران حق نه لري، چې د ښځینه ناروغانو درملنه وکړي.
