ننګرهار کې سیمه ییز طالب چارواکي وايي، د دې ولایت رودات ولسوالۍ کې د جګړې مهال د یوې پاتې شوې راکټ مرمۍ د چاودنې له امله، یوه ماشوم ژوند له لاسه ورکړی او یو بل ټپی شوی دی.
رخشانه: ننګرهار کې د طالبانو د امنیه قوماندانۍ ویاند سید طیب حماد ویلي، دا پېښه نن ماسپښین (چهارشنبې د غوايي ۱۶ مه) د رودات ولسوالۍ د «قطرغي» په سیمه کې رامنځ ته شوې ده.
ننګرهار کې د طالبانو د امنیه قوماندانۍ ویاند زیاته کړې، دې ماشومانو د څارویو څرولو پر مهال د راکټ یوه ناچاودې پخوانۍ مرمۍ موندلې وه.
نوموړي زیاته کړې، دې مرمۍ د ماشومانو د لاسوهنط له امله چاودنه کړې، چې په ترڅ کې یې یو ماشوم وژل شوی او یو بل ټپي شوی دی.
د دې پېښې ټپي ماشوم روغتون ته د درملنې لپاره وړل شوی دی.
ننګرهار کې د طالبانو د امنیه قوماندنۍ ویاند د دې پېښې د ټپي د روغتیايي وضعیت په اړه څه نه دي ویلي.
طالبانو له خلکو غوښتي، چې له جګړو پاتې شویو ناچاودو توکو باندې له لاس وهلو په جدي توګه ډډه وکړي.
په هېواد کې د تېرو جګړو څخه پاتې ناچاودي توکي او ماینونه تل له هېوادوالو په ځانګړې توګه له ماشومانو قرباني اخلي.
یوناما څه موده وړاندې په یوه راپور کې لیکلي وو، افغانستان کې د ماینونو او ناچاودو توکو د چاودنط ۸۰ سلنه قربانیان ماشومان دي.
د یوناما په وینا، افغانستان د ناچاودنو توګو د مرګ ژوبلې له پلوه په نړۍ کې درېیم هېواد دی.
په دوه نورو جلا پېښه کې بیا یوه ښځه او یو ماشومان د دوه کورونو د چت او دېوال له امله مړه شوي دي.
دغه پېښې د ننګرهار په شېرزاد او چپرهار ولسوالیو کې رامنځ ته شوې، چې په کې یوه ښځه او دوه نور ماشومان هم ټپیان شوي دي.
لومړی پېښه د شېرزاد ولسوالۍ د امان خېلو په «ګندمک» سیمه کې د یوه کور چت لوېدلي، چې له امله یې یوې ښځې ژوند له لاسه ورکړی او یوه بله ښځه ټپي شوې ده.
بل پېښه د چپرهار ولسوالۍ د «ګل دره» په سیمه کې د یوه کور د دېوال چپه کېدو له امله رامنځ ته شوې، چې په کې یوه اته کلن ماشوم ژوند له لاسه ورکړی او دوه نور ماشومان ټپیان شوي دي.
